प्राध्यापक कुट्ने कांग्रेस कार्यकर्ता छुटाउन रोक

सर्वाेच्च अदालतले त्रिभुवन विश्वविद्यालयका उपप्राध्यापक प्रेम चलाउनेमाथि आक्रमण गर्नेविरुद्धको मुद्दा फिर्ता लिने सरकारको निर्णय कार्यान्वयन नगर्न अन्तरिम आदेश दिएको छ ।

आफूमाथि आक्रमण गर्नेको मुद्दा फिर्ता लिने निर्णयविरुद्ध चलाउनेले दायर गरेको रिटमा सर्वाेच्चका न्यायाधीश डा.मनोजकुमार शर्माको एकल इजलासले सरकारको निर्णय कार्यान्वयन नगर्न विपक्षीमा नाममा अन्तरिम आदेश जारी गरेको हो । 

अदालतले प्राध्यापक चलाउनेमाथि सांघातिक आक्रमण गरेर अपांग बनाउनेहरुविरुद्धको मुद्दा फिर्ता किन लिइएको हो भनेर सरकारका नाममा कारण देखाऊ आदेश पनि जारी गरेको छ । 

गत मंगलबारको क्याबिनेट बैठकले मुद्दा फिर्ता लिने निर्णय गरेको थियो । आफूमाथि सांघातिक आक्रमण गर्ने नेविसंघका कार्यकर्ताविरुद्धको मुद्दा फिर्ता लिने सरकारको निर्णय बदरको माग गर्दै चलाउनेले हिजो सर्वाेच्चमा रिट निवेदन दर्ता गरेका थिए ।  

त्रिभुवन विश्वविद्यालयमा समाजशास्त्रका उपप्राध्यापक चलाउनेमाथि २०७७ असोज २० मा त्रिवि परिसर कीर्तिपुरमा आक्रमण गरेको आरोप लागेका नेविसंघका हरि आचार्य,योगेन्द्र रावलसहित ५ जनाविरुद्ध जिल्ला अदालत काठमाडौंमा मुद्दा थियो । तर,उक्त मुद्दा सरकारले फिर्ता लिएको छ ।