समलिङ्गी विवाहको मान्यतापछि प्रेमको विजय हुने अमेरिकी धारणा

सर्वोच्च अदालतले समलिङ्गी  विवाह दर्ता गर्न सरकारको नाममा अन्तरिम आदेश जारी गरेसँगै काठमाडौंस्थित अमेरिकी राजदूतावासले खुसी व्यक्त गरेको छ । लैङ्गिक तथा यौनिक अल्पसंख्यक समुदायका जोडीहरुको विवाह दर्ता गर्न सर्वोच्चले आदेश दिएपछि दूतावासले बधाई भनेको छ ।

उक्त फैसला वैवाहिक समानता र नेपालमा समलिङ्गी विवाहलाई मौलिक अधिकारका रुपमा मान्यता प्रदान गर्ने महत्वपूर्ण कदम भएको दूतावासको ठहर छ । आज जारी विज्ञप्तिमा दूतावासले भनेको छ, ‘आफूले प्रेम गरेको  व्यक्तिसंँग विवाह गर्ने स्वतन्त्रताबिना वैवाहिक स्वतन्त्रताको अर्थ हुँदैन भन्ने कुरा पुष्टि भएको छ ।’ 

लैङ्गिक तथा यौनिक अल्पसंख्यक समुदायका सबै नेपाली र अमेरिकीहरुले आफ्नो मौलिक अधिकारको पूर्ण प्रयोग गर्न पाउने उल्लेख गर्दै दूतावासले भनेको छ, ‘प्रेमको विजय हुन्छ ।’ समलिङ्गी विवाहलाई मान्यता दिइएकोमा अमेरिकाले खुसी व्यक्त गरिरहँदा नेपालमा भने मिश्रित प्रतिक्रिया आएको छ । राप्रपा नेपालका अध्यक्ष कमल थापाले सर्वोच्चको उक्त आदेशलाई त्रुटीपूर्ण भनेका छन् ।

उनको विचारमा समलिङ्गी विवाह प्राकृतिक नियम, सामाजिक मान्यता र संस्कारविपरीत भएकाले यसले पारिवारिक झमेला र सामाजिक विकृति फैलाउँछ । थापाको विचारमा विवाह महिला र पुरुषबीचको पवित्र सम्बन्ध हो ।

सर्वोच्चको आदेशसँगै नेपाल दक्षिण एसियामा समलिङ्गी विवाहले वैधता पाउने पहिलो मुलुक बनेको छ । सर्वोच्चले समलिङ्गी विवाह दर्ता गर्न सरकारको नाममा हिजो अन्तरिम आदेश जारी गरेको छ । यसअघि महिला र पुरुषको विवाह मात्र दर्ता हुँदै आएकोमा अब एउटै–एउटै लिङ्ग भएका व्यक्तिहरुबीचको विवाह पनि दर्ता हुने भएको छ ।