अदालतका हाकिमलाई 'फरार' सुब्बाकाे लाखाैं अफर

उच्च अदालत पाटनका रजिष्ट्रार ठगिन्द्र कट्टेललाई आफ्नो पक्षमा पार्नका लागि एक जना फरार अभियुक्तले मोटो रकम ‘अफर’ गरेको खुलासा भएको छ । नेपाल सरकारको फरार सूचीमा रहेका अर्थ मन्त्रालयका एक जना पूर्व नायव सुब्बाले लाखौं रूपैयाँको ‘ललिपप’ देखाएको र ह्वाट्सएपमा ५० लाख रूपैयाँसम्मको ‘डिलिङ्ग’ भएको संवाद सर्वोच्चका रजिष्ट्रार नारायण पन्थीको डेस्कमा पुगेको छ । ती नासुसँग उनको पारिवारिक सम्बन्ध रहेको खुलेको छ । कट्टेलको सालो नाता पर्ने उनले आफूलाई जसरी हुन्छ जोगाइदिन आग्रह गरेका छन् । 

‘कन्भरसेशन’ मा फाइनल डिलबारे क्लियर त छैन । तर, जुन हिसाबमा कुराकानी भएको छ त्यसबाट पैसाको प्रसंग छेडिएको भन्ने देखिन्छ’, स्रोतले भन्यो । स्क्रिन सटसहितको गुनासो रजिष्ट्रार पन्थीको हातमा परेपछि अनुसन्धान अघि बढाउने तयारी थालिएको छ । स्रोतका अनुसार लिखित उजुरी पर्नेबित्तिकै पन्थी ‘एक्शन’ मा जानेछन् । जाँचपड्तालका लागि अनुसन्धन अधिकारी तोक्ने तयारीसमेत भैसकेको स्रोत बताउँछ । सुब्बाविरुद्ध सम्पत्ति शुद्धीकरण अनुसन्धान विभागमा समेत उजुरी परिसकेको बुझिएको छ । कृषि सामग्री कम्पनी लिमिटेडविरुद्ध रिट निवेदन लिएर अदालत पुगेका सुब्बा फरार सूचीमा रहेको र उनलाई पक्राउ गर्न यसअघि नै पुर्जी जारी भइसकेको बल्ल खुलेको हो । 

सरकारवादी मुद्दामा फरार रहेका उनलाई पक्रन ‘अफिसियल नोटिस’ नै जारी भइसकेको हुनाले तारिख दिइएको थिएन । उनले आफ्नो पक्षबाट वारिस पठाए तर तिनले पनि बीचमै छोडिदिए । फोनमा लाखौंको ‘अफर’ गर्ने ती नासु भने आफ्नो कुनै गल्ती नभएको र पैसा नदिँदा टिप्पणी उठाएर केश बिगारिदिएको दाबी गर्दै ठाउँठाउँमा पुगिरहेका छन् । यता, रजिष्ट्रार पन्थीले भने ह्वाट्सएप म्यासेजको बारेमा कट्टेलसँग सोधपुछ गरेका छन् । कट्टेलले निवेदन दर्ता गरेर इजलासमा चढाइसकेको भनी जवाफ दिएको उच्चकी प्रवक्ता मन्दिरा शाहीले बताइन् । भ्रष्टाचार मुद्दा खेपिरहेका तत्कालीन नासु भीमकान्त भण्डारीले ह्वाट्सएपमा पैसाको अफर पठाएर रजिष्ट्रार कट्टेललाई हैरान पारेका छन् । आफ्नो मुद्दाको पेशी साउनमा पार्न उनले मुख्य रजिष्ट्रार कट्टेललाई केही समयअघि दबाब दिएका थिए । कृषि सामग्रीलगायत दुई÷तीन वटा मुद्दा खेपिरहेका भण्डारी विभिन्न मुलुकबाट मल आयात गर्ने तयारीमा छन् । 

उनी र हिमालयन होटलका मालिक राज भण्डारी मिलेर असार मसान्तभित्र ३०–४० करोड रुपैयाँको मल भित्र्याउने सहमति भएको छ । तर, मुद्दाले अप्ठ्यारो पार्ने भएपछि उनले साउनसम्मलाई पेशी सारिदिन भनेका हुन् । ‘कानुन सबैका लागि एउटै हो, जहिलेलाई मन लाग्यो पेशी सार्न सक्छु र ? एक दुई दिनको कुरा होइन, महिनौँ पछिका लागि पेशी सारिदिनुप¥यो भन्दै दबाब दिन्छ । मैले सक्दिन भनिदिएँ । आफ्नो इन्ट्रेस्टअनुसार काम नभएपछि मविरुद्ध अफवाह फैलाउने काम गरिरहेका छन्,’ उनले भने । भण्डारी ०६७ सालमा जेल परेका थिए । विदेश पठाइदिने आश्वासन देखाएर ठगी गरेको भन्दै पीडितहरूले उजुरी दिएपछि प्रहरीले पक्राउ गर्दा कट्टेलले नै ५० हजार रुपैयाँ दिएर छुटाएका हुन् । ‘मैले दिएको ५० हजार रुपैयाँ फिर्ता गरेकै छैन । म पनि होस् त भनेर चुप लागें । ५० को तीन प्रतिशत अहिले र बाँकी चेकमार्फत भन्दै सांकेतिक भाषामा मलाई म्यासेज पठाइरहेको छ’, उनले भने । 

को हुन् भीमकान्त भण्डारी ? 

ग्रामीण विकास शिक्षण प्रतिष्ठान, कलबलगुडी झापाका तत्कालीन नासु भीमकान्त भण्डारी छोटो समयमा अकुत सम्पत्ति जोड्ने सरकारी कर्मचारीमध्येमा पर्छन् । गुल्मीको मालिका गाउँपालिका वडा नम्बर ५ का भण्डारीले जागिर खाएको चार वर्षभित्रै ६ करोड रुपैयाँभन्दा बढीको सम्पत्ति जोडेको भनी अख्तियारले २०७९ सालमा विशेष अदालतमा भ्रष्टाचार मुद्दा दायर गरेको थियो । सरकारका पूर्वकर्मचारी उनले २०७७ असार ३० गते स्वेच्छिक अवकाश लिए । २०७३ असोज २१ गते सरकारी सेवामा प्रवेश गरेका उनी जागिर छोडेर विध म्यानेज्मेण्टको सञ्चालक बने । विभिन्न तस्करसँग मिलेर रासायनिक मल ल्याउने गरेका छन् । सुन तस्करीको आरोप लागेका रमेश शेर्पासँग मिलेर काम गर्दै आएका उनले गत वर्ष समयमै मल नल्याइदिँदा किसानको बिचल्ली भएको थियो । चार वर्ष सरकारी जागिरको दौरान शक्तिशाली मन्त्रीहरूको वरपर नै रहे ।

जागिर खाएको केही समयमै झापाबाट सरुवा मिलाएर काठमाडौं आएका उनी त्यसपछि यतै बसे । जागिरको क्रममा तत्कालीन संघीय मामिला तथा स्थानीय विकास मन्त्रालय, अर्थ मन्त्रालय, महिला, बालबालिका तथा ज्येष्ठ नागरिक मन्त्रालय, ऊर्जा, जलस्रोत तथा सिँचाइ मन्त्रालय पुगे । माओवादीबाट मन्त्री भएका वर्षमान पुन, कृष्णबहादुर महरा, आशा कोइराला र हितराज पाण्डेको स्वकीय सचिव भएर काम गरे । सरकारवादी मुद्दा लागेका उनी प्रहरीको फरार सूचीमा छन् । शक्तिकेन्द्रसँग बलियो साँठगाँठ रहेकाले पनि उनलाई जोगाइएको अधिकांशको बुझाइ छ । विध म्यानेजमेण्टबाहेक उनको अन्य कम्पनीमा पनि धेरै लगानी छ । गत निर्वाचनताका सिसिटिभी क्यामेरा खरिदको ठेक्का पाएको विधले ठूलै घोटाला गरेको विषय बाहिर आएको थियो ।