कृषि विकास सहकारीले बचत फिर्ता नगरेपछि निक्षेपकर्ता सडकमा, जायजेथाबाट असुलउपर गर्ने

ललितपुरको कुमारीपाटीमा रहेको कृषि विकास बहुउद्देश्यीय सहकारी संस्था लिमिटेडका निक्षेपकर्ताहरुले संघर्ष समिति गठन गरेका छन् । 

सहकारीले महिनौंदेखि निक्षेप फिर्ता नदिएको विरोधमा एकजुट भएर आवाज उठाउनका लागि निक्षेपकर्ताहरुले संघर्ष समिति गठन गरेका हुन् । ११ महिनादेखि पटक–पटक आफ्नो निक्षेप फिर्ता माग्दा पनि सहकारीका अध्यक्ष तेजविक्रम थापाले चासो नदेखाएपछि बाध्य भएर समिति गठन गर्नुपरेको पीडित सुहाना केसीले बताइन् । 

कार्यालय सञ्चालनमा रहेपनि लामो समयदेखि एक रुपैयाँ पनि फिर्ता नदिएको उनको भनाइ छ । ‘त्यहाँ बचत गर्ने कसैले ११ महिनादेखि एक रुपैयाँ पनि पाउनुभएको छैन् । दिनहुँ सहकारी जान्छौं, दिनभर कुर्छौं अनि फर्किन्छौं । अहिले सबैजसो सहकारीमा समस्या छ, त्यो हामी पनि बुझ्छौं । तर, कहाँ लगानी छ, के कारणले समस्या आयो, यो त भनिदिनुपर्यो नि’, उनले भनिन् । 

सहकारी विभागले सहकारीको लगानीको विवरण माग गरेपनि अध्यक्ष थापाले अटेर गरेको उनी बताउँछिन् । उनका अनुसार थापाले चैत मसान्तभित्र सबै समस्या सुल्झाएर निक्षेप फिर्ता गर्ने प्रतिबद्धता जनाएका थिए । 

तर, समस्या समाधानमा कुनै चासो नदेखाएको पीडित केसीको गुनासो छ । हिजो गठन गरेको समितिले सहकारीको नाममा रहेको जायजेथा-अचल सम्पत्तिको तथ्याङ्क संकलन गर्ने र सामूहिक रुपमा दाबी पेश गरेर निक्षेपकर्ताहरुको निक्षेप असुलउपर गर्ने निर्णय गरेको छ । 

साथै, सहकारीकै कार्यालयमा एउटा कोठाको व्यवस्था गरेर सहकारीको दैनिक गतिविधि सूक्ष्म रुपमा हेर्नेलगायतका प्रस्ताव गरिएको पीडित केसीले जानकारी दिइन् । उक्त सहकारीमा झण्डै आठ हजार बचतकर्ताको एक अर्ब रुपैयाँभन्दा बढी निक्षेप छ । सहकारीमा जम्मा गर्नेहरु लगनखेल, जाउलाखेल, मंगलबजारका स्थानीय हुन् ।