आगामी आमनिर्वाचनपछि एक्लै सरकार बनाउने केपी ओलीको दाबी

प्रमुख प्रतिपक्ष नेकपा एमालेका अध्यक्ष केपी शर्मा ओलीले चार वर्षपछि हुने आमनिर्वाचनमा बहुमत ल्याएर आफ्नो पार्टीले एकल सरकार बनाउने दाबी गर्नुभएको छ । 

पार्टीको बागमती प्रदेश कमिटी बैठकलाई आज पार्टी मुख्यालय च्यासल, ललितपुरमा सम्बोधन गर्दै उहाँले २०८४ मा हुने आमचुनावमा ५१ प्रतिशत जित निकालेर एकल बहुमतको सरकार बनाउने मिसनमा आफूहरु लाागेको बताउनुभएको हो । त्यसक्रममा उहाँले अहिले आफ्नो पार्टी सरकार बनाउने र गिराउने खेलमा नलाग्ने समेत प्रष्ट पार्नुभयो । 

‘अहिले हामी मिसन ०८४ र मिसन ५१ प्रतिशत जित निकालेर आफ्नै एकल सरकार बनाउनेतिर लागेका छौं’, अध्यक्ष ओलीले भन्नुभयो, ‘यो सरकार बनाउने, जोगाउने खिचलोमा लाग्ने फुर्सद छैन । हामीलाई यता र उताको टेको खोज्नु छैन ।’