जिल्ला सभापतिहरुको भेलापछि काँग्रेस केन्द्रीय समिति बैठक, पार्टी सभापतिको निवासमा ‘एजेण्डा सेटिङ’

नेपाली काँग्रेसले झण्डै एक वर्षपछि बोलाएको केन्द्रीय समितिको बैठक आज दिउँसो १ बजे बस्दैछ । सानेपास्थित पार्टी केन्द्रीय कार्यालयमा बैठक बस्नुअघि बिहान ९ बजे सभापति शेरबहादुर देउवाले पदाधिकारीहरुको बैठक बोलाउनुभएको छ ।

बैठकको एजेण्डा तय गर्न सभापति देउवाको निवास चप्पल कारखानामा बैठक राखिएको हो । केन्द्रीय समिति बैठकमा समसामयिक राजनीतिक तथा पार्टी संगठनका विषयमा छलफल हुने जानकारी दिइएको छ । 

आजको बैठकमा नक्कली भुटानी शरणार्थी प्रकरणमा कारागार पुगेका नेता बालकृष्ण खाँणको पछिल्लो राजनीतिक हैसियतबारे पनि छलफल हुने बताइएको छ । प्रत्येक दुई महिनामा बस्नुपर्ने बैठक एक वर्षपछि बोलाइएको हो । अघिल्लो साता काँग्रेस जिल्ला सभापतिहरुको भेला बोलाइएको थियो । महामन्त्रीद्वय गगन थापा र विश्वप्रकाश शर्माको पहलमा आयोजना गरिएको उक्त भेलामा सभापति शेरबहादुर देउवा अनुपस्थित हुनुहुन्थ्यो ।