पराराष्ट्रमन्त्री साउदले सुदूरपश्चिमको आफ्नै सरकार ढाल्न खोजेपछि

नेपाली कांग्रेसका प्रभावशाली नेता तथा परराष्ट्रमन्त्री एनपी साउदले कांग्रेसकै नेतृत्वको सुदूरपश्चिम प्रदेश सरकार ढाल्न खाजेको प्रयास असफल भएको छ ।

साउदले मुख्यमन्त्री कमलबहादुर शाहलाई आफ्ना खास सहयोगी बहादुरसिंह थापालाई रातारात दलको नेता बनाएर मुख्यमन्त्री बनाउने प्रयास गरेका थिए । बजेटलाई कांग्रेस सहितका सत्तारुढ दलमा भएको विवादमा खेल्दै साउदले मुख्यमन्त्री परिवर्तन गर्न खोजेका थिए । 

कांग्रेस सोतका अनुसार शुक्रबार रातिसम्म पुराना नेता बहादुरसिंह खड्काका पक्षमा १८ सदस्यीय संसदीय दलमा ११ जना पुगेका थिए । उनीहरुले हस्ताक्षर गरेर दलको बैठक बोलाएर दलको नेता परिवर्तन गर्न खोजेका थिए ।

त्यो बेला मुख्यमन्त्री शाहका पक्षमा मुख्यमन्त्री शाह, भौतिक पूर्वाधारमन्त्री प्रकाशबहादुर देउवा, बाजुराका प्रदेश सभा सदस्य पदम शाही, डडेल्धुराकी सरस्वती खड्का र कैलालीकी डम्मरी महरा (रक्षा) सहित पाँच जना मात्र थिए । 

देउवाका सहोदर भतिज रहेका मन्त्री प्रकाशले त्यो कुरा शुक्रबारै कांग्रेस सभापति शेरबहादुर देउवाका स्वकिय सचिव भानु देउवालाई जानकारी गराएको र देउवाले परराष्ट्रमन्त्री एनपीलाई मुख्यमन्त्री परिवर्तन गर्ने खेलबाट पछाडि हट्न बाध्य पारेको काँग्रेसको उच्च स्रोतको भनाइ छ । 

मन्त्री प्रकाश देउवाले धनगढीमा बसेर विपक्षमा रहेका मेघराज खड्का, विक्रम धामी, जुना दानी, ललिता सुनार लगायतलाई त्यही क्रममा चुप बस्न सहमत गराएको चर्चा पनि छ । 
विभिन्न प्रयासपछि प्रदेश सभा सदस्यहरु बहादुरसिंह थापा, दिवानसिंह विष्ट, शिवराज भट्ट, प्रकाश वम र गीता चौधरी मात्रै फरक समूहमा रहेको बताइन्छ ।

परराष्ट्रमन्त्री साउदले बजेटमा मन्त्री प्रकाश देउवाले एकलौटी गरेको, मन्त्री देउवाको अनावश्यकरुपमा सरकारमा हावी भएको,  आफू र प्रदेश सभापति वीरबहादुर बलायरलाई बेवास्ता गरेको भन्दै मुख्यमन्त्री कमलबहादुर शाहलाई हटाउन खोजेको बताइन्छ । मन्त्री देउवाले गर्दा नै पराराष्ट्रमन्त्री साउद निकट स्रोतका अनुसार मन्त्री साउद सुदूरपश्चिम आउदा गाडी लगायतका सुविधा लिन कठिनाई हुने गरेको छ ।

कांग्रेसमा फेरि समस्या आउन सक्ने आकलनले नै शनिबार राति १० बजे बजेट पास गरिएको छ । जवकी प्रतिपक्षहरु एमाले, राप्रपा र स्वतन्त्र डा. ताराप्रसाद जोशीले बैठक बहिस्कार गरेका थिए । तर राप्रपाका खेमादेवी विष्टलाई फकाएर मुख्मन्त्री शाहले प्रदेश सभामा ल्याएका थिए । त्यसपछि बजेटको पक्षमा ३९ र विपक्षमा राप्रपाको एक मत परेको थियो । बजेट ध्वनी मतले पारित गरिएको थियो ।