‘केपी बा’ मा जोडिएर आफ्ना भिडियो हेर्न एमाले अध्यक्षको आग्रह

नेकपा एमालेका अध्यक्ष केपी शर्मा ओलीले आफ्नो यूट्युब च्यानल ‘केपी बा’ सब्सक्राइब गर्न आग्रह गर्नुभएको छ । समाजिक सञ्जाल फेसबुकमा स्टाटस लेख्दै उहाँले आफ्नो जीवनका थुप्रै मर्मस्पर्शी अनुभव समेटिएका भिडियोहरु हेर्न च्यानल सस्क्राइब गर्न अनुरोध गर्नुभएको हो । 

२०५२ सालमा पाँच हजार फिट माथि उडेको हेलिकोप्टरबाट झरेर पनि बाँच्न सफल भएको सन्दर्भ स्मरण गर्दै उहाँले यस्ता थुप्रै भोगाई र जीवनका अनुभवहरु ‘केपी बा’ मा राख्दै जाने पनि बताउनुभएको छ । त्यतिबेला आफू बाँचेकोमा आफैंलाई अचम्म लागेको बताउँदै ओलीले मृत्युलाई हराउन सकेकोमा मन आनन्दित भएको अनुभवसमेत बाँड्नु भएको छ । 

‘पाँच हजार फिट माथि उडेको हेलिकप्टरबाट झर्दा मलाई म बाँच्छु जस्तो नै लागेको थिएन । झरिसकेपछि आफूलाई जिउँदो पाउँदा हतारहतार आफ्ना हातखुट्टा छामी हेरेँ । आश्चर्य लाग्यो । म घाइते थिएँ तर जिउँदो थिएँ । मृत्युलाई हराउन सफल भएकोमा मन आनन्दित भयो । सफलताको अनुभूति गरेँ । बाँच्नु आफैँमा एउटा सफलता हो । मृत्युका मुखमा पुगेर बाँच्नु मेरा लागि अझ ठूलो सफलताको विषय बन्न पुग्यो’, उहाँले भन्नुभएको छ ।
  
जीवनका थुप्रै यस्ता अनुभवहरू युट्युब च्यानलमा सेयर गर्दै आइरहेको र आगामी दिनमा पनि त्यस्ता भिडियोहरु राख्दै जाने बताउनुभएका ओली भन्नुहुन्छ, ‘च्यानल सस्क्राइब गर्नुहोस् न है ।’