एमालेमा सदस्य घट्दा काँग्रेसद्वारा सात लाख बढाउने उद्घोष

जन आस्था

साउन २, २०८०

वैकल्पिक पार्टीहरुको उदयले पुराना दलहरुमाथि चुनौती बढेको टिप्पणी भइरहेका बेला सत्तारुढ नेपाली काँग्रेसले सदस्यता विस्तारलाई व्यापक बनाउने भएको छ ।

आजदेखि शुरु भएको कन्द्रीय कार्यसमितिको बैठकमा महामन्त्री गगन थापाले संगठन विस्तारलाई तीब्रता दिँदै २०८० सालभित्र कम्तीमा पाँच लाखलाई काँग्रेसको सदस्य बनाउने प्रस्ताव पेश गरेका हुन् । पहिलोपटक फेसबुकमार्फत् प्रत्यक्ष प्रसारण गरिएको बैठकमा उनले ‘घर–घर जाऔँ, पार्टी सदस्य बनाऔँ’ अभियान चलाउने प्रस्ताव गरेका थिए ।

यहि साउन २० गतेदेखि आगामी असारसम्म चल्ने उक्त अभियानमार्फत संगठन विस्तार र सुदृढीकरण गर्दै सदस्य संख्या थप्ने योजना अघि सारिएको छ । नयाँ व्यक्तिलाई पार्टीमा आवद्ध गराउँदै कम्तीमा पाँचदेखि सात लाख पार्टी सदस्य थप्ने उद्देश्यसाथ अभियान थाल्न केन्द्रीय समिति बैठकले महामन्त्री थापाले उक्त प्रस्ताव अघि सारेको जानकारी दिए ।

१४ औँ महाधिवेशनको तथ्याङ्कअनुसार काँग्रेसमा हाल क्रियाशील सदस्य साढे आठ लाख हाराहारी छ । महामन्त्री थापाको यो प्रस्ताव बैठकले पास गरे, उक्त योजना सफल भए एक वर्षभित्र सो संख्या १४ लाख पुग्नेछ ।

मुलुककै जेठो पार्टी काँग्रेसले सदस्य संख्या बढाउने महत्वाकांक्षी योजना अघि सारिरहँदा अर्को पुरानो शक्ति एमालेमा भने सदस्यता नवीकरण अनपेक्षितरुपमा घटेको बताइएको छ । नवीकरणको मिति सकिन १५ दिन बाँकी हुँदा देशभरबाट ५० प्रतिशतको हाराहारीमा मात्रै सदस्यता नवीकरण भएको सो पार्टीका नेताहरुले बताएका छन् ।

दुई वर्षअघि सम्पन्न १० औँ महाधिवेशनमा एमालेले संगठित सदस्य संख्या साढे आठ लाख रहेको दाबी गरेको थियो । सोही संख्यालाई बढाएर १५ लाख पुर्याउने योजनासहित आक्रामक संगठन विस्तारमा लागेको एमालेको ‘मिसन ग्रासरुट’ अभियानसम्म आइपुग्दा सांगठनिक स्थिति निराशाजनक देखिएको हो ।