कोरियाबाट फर्किएकालाई इपिएस खुल्यो

दक्षिण कोरियामा काम गरेर फर्किएकाहरुलाई इपिएस कोरिया शाखाले भाषा परीक्षाको आवेदन खुलाएको छ । 

शाखाले आज सूचना प्रकाशित गर्दै पाँच वर्ष कोरियामा रोजगार गरेर फर्किएकाले आगामी साउन १३ गतेदेखि १५ गतेसम्म आवेदन दिन सक्ने जानकारी दिएको हो । सूचनामा आवेदन दिन इपिएसअन्तर्गत कोरियामा रोजगारी प्राप्त गरेका र सन् २०१० जनवरी १ पश्चात् भिसा अवधिभित्रै स्वैच्छिक रुपले नेपाल फर्केको हुनुपर्ने, १८ वर्ष पूरा भई ३९ वर्ष ननाघेको हुनुपर्ने, फौजदारी अभियोगमा सजाय पाएको हुनु नहुने जस्ता शर्त राखिएको छ ।

त्यस्तै, कोरियामा गई गैरकानूनी रुपमा बसोबास नगरेको, नेपालबाट अन्य मुलुकमा जान रोक नलगाइएको, कलर व्लाइडनेस नभएको, कोरियामा ई–९ र ई–९–१ भिसामा पाँच वर्षभन्दा बढी अवधि नबसेको र कोरियाको मानव संशोधन विभागबाट इपिएस भाषा परीक्षामा सहभागी हुन सक्ने भनेर नामावलीमा नाम भएकाले फाराम भर्न सक्ने सूचनामा उल्लेख छ । 

इपिएस कोरिया शाखाले परीक्षा आगामी भद्रौ १८ गतेदेखि २९ गतेसम्म हुने जनाएको छ । त्यसको नतिजा असोज ३ गते प्रकाशन गरिने छ ।