पुष्पलाल स्मृति दिवसको अवसरमा प्रवचन गोष्ठी

नेपाल कम्युनिष्ट पार्टी (नेकपा) का संस्थापक महासचिव पुष्पलाल श्रेष्ठको ४६ औं स्मृति दिवसको अवसरमा विशेष कार्यक्रमको आयोजना गरिने भएको छ । 

पुष्पलाल मित्रता केन्द्रले साउन ८ गते काठमाडौँमा ‘समाजवादी यात्राको चुनौतीः भ्रष्टाचार र दण्डहीनता’ विषयक प्रवचन गोष्ठीको गर्न लागेको हो । साउन ८ गते दिँउसो साढे १२ बजेका लागि कार्यक्रम तय भएको नेकपा एकीकृत समाजवादी पार्टीका उपमहासचिव जगन्नाथ खतिवडाले जानकारी दिए । थापागाऊँस्थित बानेश्वर बैंक्वेटमा कार्यक्रम हुनेछ । 

कार्यक्रममा समाजवादीका वरिष्ठ नेता झलनाथ खनाल, गृहमन्त्री तथा माओवादी केन्द्रका बरिष्ठ उपाध्यक्ष नारायणकाजी श्रेष्ठ, जनता समाजवादी पार्टी (जसपा) का अध्यक्ष उपेन्द्र यादवले आफ्नो धारणा राख्नेछन् । राष्ट्रिय जनमोर्चाका अध्यक्ष चित्रबहादुर केसी, नेकपाका महासचिव नेत्रविक्रम चन्द (विप्लव) र समाजवादीका महासचिव घनश्याम भुसाल पनि वक्ता छन् । 

नेपालमा कम्युनिष्ट पार्टी स्थापना गर्न अहम् भूमिका खेलेका पुष्पलालको सम्मान र सम्झनामा विभिन्न घटकमा विभाजित कम्युनिष्ट पार्टीहरुले हरेक वर्ष कार्यक्रम गर्ने गरेका छन् ।