महिलाको घोर अपमान गर्ने सरकारी कर्मचारीको चौतर्फी आलोचना

सरकारी सेवामा कार्यरत एक जना अधिकृतले महिलाहरुबारे आपत्तिजनक प्रश्नोत्तर राखेर लोकसेवाको तयारीसम्बन्धी पुस्तक छापेको पाइएको छ । समग्र महिलामाथि आक्षेप लाग्ने शब्द प्रयोगसहित पुस्तक प्रकाशन गरेपछि यतिबेला सामाजिक सञ्जालमा चर्को विरोध भैरहेको छ । 

वन तथा वातावरण मन्त्रालयका सहायक संरक्षण अधिकृत रामएकवाल दासले लोकसेवा तयारीका निम्ति लेखेको ‘नेपाल वन सेवा दिग्दर्शन गेमस्काउट,वनरक्षक सफलताको साथी’ नामक पुस्तकमा एकदमै अपमानजनक प्रश्नोत्तर राखिएको छ । पेज नम्बर १४३ को प्रश्न नम्बर १८ मा सोधिएको छ,‘केटीलाई भालु किन भनिएको होला ?’

चार वटा ‘अप्सन’ मा उत्तर लेखिएको छ । पहिलो नम्बरमा पोथी भालुजस्तै व्यवहार भएर भन्ने उत्तर दिइएको छ । दोस्रोमा पोथी भालुले एकपल्टमा धेरै भालेसंग संसर्ग गर्ने भएर,तेस्रोमा पोथी भालु बहुपति गामी हुन्छ र चौथो नम्बरमा माथिको सबै अप्सन दिइएको छ । 

उत्तरदाताले तीमध्ये एउटा उत्तर छनोट गर्नुपर्ने भनिएको छ । दरिद्र मानसिकता बोकेको व्यक्तिले किताब लेखेको भन्दै सामाजिक सञ्जालमा लेखक दासमाथि गालीको वर्षात शुरु भएको छ । एक जना सामाजिक सञ्जाल प्रयोगकर्ताले लेखेका छन्,‘कस्ता लेखक हुन् ? कस्ता प्रकाशक हुन् ? कस्ता सम्पादक हुन् ? के ठानेर यस्तो लेख्दा हुन् । अत्यन्त भर्त्सनायोग्य कृत्य ।’

अर्कोले भनेका छन्,‘वन्यजन्तुसम्बन्धी पढेको रे,मान्छे पनि जन्तु नै रहेछ ।’ काठमाडौंको कलँकीस्थित विद्या विकास पब्लिकेशन प्रालिले प्रकाशन गरेको पुस्तक प्रतिबन्ध लगाउनुपर्ने माग उठेको छ ।  

यता, पब्लिकेशनले उक्त पुस्तक नबेच्न सबै पुस्तक पसललाई जानकारी गराइसकेको बताएको छ । किताबमा त्रुटि भेटिएपछि बजारबाट फिर्ता गर्न लागिएको पब्लिकेशनकी एक कर्मचारीले बताइन् । 

ती कर्मचारीका अनुसार पब्लिकेशनले उक्त किताब छाप्ने अधिकारको मात्र जिम्मा लिनेछ । ‘किताबभित्र छाप अधिकार मात्रै भनेर स्पष्टै लेखिएको छ । उहाँले नै सबै टाइप गरेर पठाउनुभएको हो । उहाँले सबै तयार छ, छाप्नु भनेपछि हामीले छापेका हौं । अहिलेलाई सबै बुक पसललाई उक्त किताबमा त्रुटि भेटिएकाले नबेच्नु भनेर आग्रह गरिसकेका छौं’, उनले भनिन् । 

पढाइ डिग्री,काम घटिया

लेखक दासले त्रिभुवन विश्वविद्यालयबाट वन्यजन्तु व्यवस्थापन तथा जैविक विविधता संरक्षण विषयमा स्नातकोत्तर गरेका छन् । त्यस्तै,उनले ग्रामीण विकासमा समेत स्नातकोत्तरको डिग्री हासिल गरेका छन् । 

उनले जिल्ला भू–संरक्षण कार्यालय,महोत्तरी, सिन्धुली, दोलखालगायतका जिल्लामा काम गरिसकेका छन् । उनले राष्ट्रिय निकुञ्ज कार्यालय,पर्सा,आरक्ष संरक्षण क्षेत्र कार्यालय, बर्दिया,पर्सा, खप्तड, सगरमाथा, गौरीशंकर, लामटाड, मकालु वरुण हुँदै हाल वन तथा वातावरण मन्त्रालयमा सहायक संरक्षण अधिकृतको भूमिका निर्वाह गरिरहेका छन् ।  

सरकारी स्तरमा २५ वर्ष जागिर खाइसकेको व्यक्तिको महिलालाई हेर्ने दृष्टिकोणमा अझैपनि परिवर्तन नआउनु लाजमर्दो कुरा हो । दासको सोचले उनको शैक्षिक योग्यतामा समेत गम्भीर प्रश्न खडा गरेको छ ।  एक्काइशौं शताब्दीमा आइसक्दा पनि पुरुषको मानसिकता बदलिन सकेको छैन भन्ने कुरा यहाँबाट प्रष्टै हुन्छ । महिला हकहितका लागि दिनहुँ आवाज उठिरहँदा सरकारी सेवामा रहेका कर्मचारीबाट यस्तो घटिया काम हुनु आफैंमा लज्जास्पद छ ।