चौथो पटकसम्म निर्माण सम्पन्न नगर्ने ठेकेदारको सम्झौता तोडिने

यातायात पूर्वाधार निर्देशनालयअन्तर्गत पूर्वाधार विकास कार्यालय, मोरङ्गले काठमाडौंको मैतीदेवीमा रहेको श्री श्रेष्ठ–रमन–एपेक्स जेभीसँगको ठेक्का सम्झौता रद्द गर्ने चेतावनी दिएको छ । चौथो पटक म्याद थप्दासमेत निर्माण कार्य सम्पन्न नभएपछि कार्यालयले ठेक्का सम्झौता रद्द गर्ने चेतावनी दिएको छ । 

कार्यालयले विराटचोक–घिनाघाट सडक निर्माणको ठेक्का २०७६ असार २९ गते जेभीलाई दिएको थियो । २०७८ असार २८ गते काम सम्पन्न गर्ने सम्झौता भएपनि जेभीले विभिन्न बहानामा आलटाल गर्दै आएको थियो । गत असार २१ गतेसम्म चौथो पटक म्याद थप गरिएपनि हालसम्म निर्माण कार्य सम्पन्न नभएको कार्यालयले जनाएको छ । 

कार्यालयले आगामी १५ दिनभित्र चित्तबुझ्दो स्पष्टीकरण, स्रोत परिचालनको भरपर्दो योजना र कार्य सम्पन्न गर्ने प्रतिबद्धतासहित उपस्थित हुन जेभीका सम्बन्धित व्यक्तिलाई निर्देशन दिएको छ । 

सूचनामा भनिएको छ, ‘चौथोपटक गरी मिति २०८०–३–२१ सम्म म्याद थप गरिएको अवधिमा समेत निर्माण कार्य सम्पन्न गर्नेतर्फ कुनै चासो नदेखाइएकोले सूचना प्रकाशनको मितिले १५ दिनभित्र कार्य सम्पन्न हुन नसकेको कारण र कार्य सम्पन्न गर्न सक्ने अपडेट वर्क सेड्युल, स्रोत परिचालनको भरपर्दो योजना र कार्य सम्पन्न गर्ने प्रतिबद्धतासहित सम्पूर्ण आधिकारिक व्यक्तिहरु यस कार्यालयमा उपस्थित हुन यो सूचना जारी गरिएको छ ।’

सूचना जारी गर्दासमेत बेवास्ता गरिएमा सार्वजनिक खरिद ऐन, २०६३ तथा नियमावली २०६४ र ठेक्का सम्झौतामा प्रावधान भएबमोजिम ठेक्का सम्झौता तोडेर कालोसूचीमा राख्न पठाउने कार्यालयले भनाई छ । त्यस्तै, कार्य सम्पादन जमानत, अग्रिम भुक्तानी जमानत, धरौटीबापतको रकम जफत गर्नुका साथै बाँकी काम गर्न लाग्ने खर्च र निर्माणस्थल सुरक्षामा लाग्ने खर्चसमेत असुलउपर गरिने कार्यालयको चेतावनी छ ।