कर अनुगमन ‘फ्रेन्ड्ली’ रहेको आन्तरिक राजस्व कार्यालयको दाबी

आन्तरिक राजस्व कार्यालयले नियमित रुपमा अघि बढाएको अनुसन्धान, अनुगमन तथा निगरानीलाई कडाईका साथ निरन्तरता दिने भएको छ । कार्यालयका अधिकारीहरुका अनुसार राजस्व असुलीको विभिन्न शीर्षकमा कर तिर्नुपर्ने व्यवस्थालाई अझ चुस्त र दुरुस्त बनाउन उनीहरु खटिनेछन् ।

सो कार्यमा काठमाडौं उपत्यकामा रहेका कार्यालयहरुले पनि आफ्नो निगरानी बढाउने, तत्काल जरिवाना गराउने र कानूनले बन्देज लगाएका सामान जफत गर्ने बताइएको छ । सोही क्रममा आन्तरिक राजस्व कार्यालय बानेश्वरले गत आर्थिक वर्षमा ४ लाख ५५ हजार जरिवाना तिराएको तथ्याङ्क छ ।

त्यहाँबाट खटिएका कर अधिकृतको टोलीले अनुगमनको क्रममा तीन सय ९० करदाताको अनुगमन गरेको थियो । तीमध्ये केहीमा कैफियत फेला परेको बताइन्छ । उनीहरुले खाता स्पष्ट नराखेको, बिल दुरुस्त नभएको, घरेलु मदिराको बजारीकरण गरिएकालगायत कैफियत फेला परेको थियो । 

अनुगमनकै क्रममा झुठ्ठा कर विवरण पेश गर्नेलगायत गैरकानुनी कार्य गर्नेलाई जरिवाना गराइएको थियो । आन्तरिक राजस्व कार्यालय, बानेश्वरका सूचना अधिकारी कोष शैलेन्द्र रिजालका अनुसार गत आर्थिक वर्षमा राजस्व असुलीको वार्षिक लक्ष्य ८ अर्ब ५० करोड २६ लाख १८ हजारको रहेकोमा सोही अवधिमा ६ अर्ब ८३ करोड ५६ लाख ५८ हजार असुली भएको छ । विभागको राजस्व असुलीको अनुपातमा हेर्दा उक्त रकम ८० दशमलब ४१ प्रतिशत हुन आएको छ ।

कार्यालयमा हालसम्म ११ हजार ९ सय ८१ जना दर्ता भएका छन् भने व्यक्तिगत प्यान १ लाख ७ हजार ९ सय २५ जनाले प्राप्त गरेको बताइन्छ । अन्तशुल्कमा १ हजार ६५ जना दर्ता छन् । 

यसैगरी, डब्ल्यू प्यान (विथ होल्डर) मा ६३ जना पुगेका छन् । दैनिक छ जना अधिकृतको छुट्टाछुट्टै तीन वटा समूह बनाएर अनुगमनमा निस्कने लक्ष्य लिइएको कार्यालयले जनाएको छ । बुद्धनगर, शंखमूल, बिजुलीबजार, बानेश्वर, सिनामंगललगायत मुख्य बजारमा आफ्नो अनुगमनलाई केन्द्रित गर्ने गरिएको पाइएको छ ।

आफुहरुको अनुगमन ‘फ्रेन्ड्ली टाइप’ को हुने गरेको उल्लेख गर्दै सूचना अधिकारी कोष शैलेन्द्र रिजालले भने, ‘कर तिर्नुपर्छ भन्ने कर्तव्यको जनचेतना जगाउने र त्रुटी भेटिएको खण्डमा देखाउने, बुझाउने र सम्झाउने गरिन्छ ।’