पाकिस्तानमा प्रतियोगिता, नेपालमा बिदा

नेपाल र पाकिस्तानबीच हुन लागेको क्रिकेट प्रतियोगिताको अवसरमा धनुषाको जनकपुरधाम उपमहानगरपालिकाले विद्यालयमा आधा दिनको छुट्टी दिएको छ । आज दिउँसो ३ बजेदेखि हुन लागेको खेल टेलिभिजनमा हेर्न उपमहानगरपालिकाले आधा दिनको छुट्टी दिने निर्णय गरेको छ । 

सम्पूर्ण सामुदायिक तथा संस्थागत विद्यालयलाई केही बेरअघि पत्राचार गर्दै उपमहानगरपालिकाले दिउँसो २ बजेपछि विद्यालय बन्द गर्न निर्देशन दिएको हो । ‘आज पाकिस्तानसँग एशिया कपको पहिलो खेल ३ बजेदेखि खेलिने भएकोले हाम्रो गौरवान्तित टीमको हौसला बढाउन र विद्यार्थीहरुमा खेलप्रति ऊर्जावान भावना जागृत गराउन २ बजेपछि कुनै पनि कक्षा सञ्चालन नगरी बिदा गरिदिनुहुन’, पत्रमा उल्लेख छ । 

उपमहानगरपालिकाका प्रवक्ता परमेश्वरकुमार झाले विद्यार्थीहरुमा खेलप्रति ऊर्जावान भावना जागृत गर्न विद्यालय बन्द गरेर टेलिभिजनमा क्रिकेट प्रतियोगिता देखाउन लागिएको बताए ।