जडिबुटीमा चार वटा सवारी साधन ठोक्कियो, १२ जना घाइते

कोटेश्वरको जडिबुटीमा चार वटा सवारी साधन आपसमा जुध्दा एक दर्जन घाइते भएका छन् । एउटा बस, एउटा बोलेर जिप, एउटा मोटरसाइकल र एउटा स्कुटर आपसमा ठोक्किँदा १२ जना घाइते भएका हुन् । 

भर्खरै भएको दुर्घटनामा घाइते छ जनालाई सिभिल अस्पताल र अन्य छ जनालाई नजिकैको मदरल्याण्ड अस्पताल पुर्याइएको छ । प्रहरीका अनुसार पेप्सीकोलातर्फबाट आएको मूलपानी–रत्नपार्क रुटमा चल्ने बा.३ ख ४८४८ नम्बरको बस, बा.६ च ५३४२ नम्बरको बोलेरो जिप, बाग्मती प्रदेश ०२ ०४१ प ४८३८ नम्बरको मोटरसाइकल र बाग्मती प्रदेश ०२ ०३७ प ५३११ नम्बरको स्कुटर आपसमा ठोक्किएको हो । 

अरु घाइतेको अवस्था सामान्य रहेको बताइन्छ । दुर्घटनाग्रस्त सवारीसाधन सबै ट्राफिक प्रहरीको नियन्त्रणमा रहेको बताइएको छ । दुर्घटनाको थप विवरण प्राप्त हुन बाँकी छ ।