सिंहदरबारमा आगो सल्काउने बालेनको धम्कीबारे सिंहदरवारकै मन्त्रीहरु मौन

काठमाडौं महानगरपालिकाका मेयर बालेन साहले गत साता मुलुकको प्रशासनिक केन्द्र सिंहदरबारमा आगो लगाउने धम्की दिए । गत शुक्रबारदेखि सर्लाहीमा दुई धार्मिक सम्प्रदायबीच भिडन्त भएपछि प्रशासनले कर्फ्यु र निषेधाज्ञा आदेश जारी गर्यो । उता,धरानका मेयर हर्क साम्पाङको उत्तेजक प्रतिक्रिया र गाई काटिएको विषयले सुनसरी पनि एक साता बढी तात्यो । 

स्थानीय प्रशासन र स्थानीय तहले सामान्य धारणा,आदेश दिए पनि संघीय सरकारले ती घटनामा कुनै प्रतिक्रिया जनाएको देखिएन । किन यस्तो भएको होला ? भनेर जनआस्थाले एक जना मन्त्रीलाई सोधेको थियो । उनले भने, ‘यस्तो विषयमा क्याबिनेटमा सिरियस छलफल हुने गरेको छ तर कार्यान्वयनबारे केही बोलिँदैन । बालेनबारे पनि क्याबिनेटमा सामान्य ढंगले कुरोसम्म उठेको छ ।’

कुरो उठाउने तर कार्यान्वयनको निम्ति कुनै आदेश वा निर्देशन नदिने हो भने क्याबिनेटको औचित्य कसरी प्रमाणित हुन्छ ? अर्का एक जना मन्त्रीले भने, ‘राजधानीको फोहोर नउठेको र नउठाइएको बारेचाहिँ  छलफल भयो  । नेताहरुलाई सिसडोलमा गाड्ने बालेनको चर्को अभिव्यक्तिबारे पनि क्याबिनेटमा कुरा उठ्यो । तर, ठोस निर्णय गरिएन ।’ 

क्याबिनेटमा भन्दा सत्ता गठबन्धनमा आवद्ध दलका शीर्ष नेताहरुको बैठकमा बालेन, हर्क साम्पाङ र सर्लाही काण्डबारे कुराकानी भएको नेपाली काँग्रेसका एक जना नेताले बताए । ‘के भयो भन्नेबारे थाहा भएन ।
तर, केही समयअघि क्याबिनेटमा फोहोर व्यवस्थापनबारे कुरा उठेको थियो । जे मनलाग्यो त्यही बोल्न नपाइने विषयमा उहाँहरु सहमत हुनुहुन्छ,’ ती नेताको भनाई छ ।

पछिल्लो समय व्यापक चर्चामा आएको सुन काण्ड,नक्कली भुटानी शरणार्थी काण्डबारे भने क्याबिनेटमा कुनै छलफल नभएको बताइन्छ । 

यसैबीच प्रधानमन्त्रीले आगामी महिना गर्न लाग्नुभएको मित्रराष्ट्र चीनको भ्रमणबारे क्याबिनेट बैठकमा हालसम्म कुनै एजेण्डा नलगिएको स्रोतको दाबी छ । भ्रमणको क्रममा चीनबाट प्राप्त हुने आर्थिक सहयोगबारे खास एजेण्डामाथि सरकारले औपचारिक छलफल गरेको छैन ।

‘अनौपचारिक रुपमा विकास निर्माणबारे कुरो हुने बताइएको छ । चीनले ठोस रुपमा हिल्सा–सिमकोट सडकलाई सहयोग गर्ने वचन दिइसकेको बुझिएको छ । अन्य विकास निर्माणबारे थप छलफल गरौं भन्ने चीनको भनाई छ । नेपालले यसअघि गरेको प्रस्तावमा सकारात्मक जवाफ दिएको बताइएको छ,’ एक जना मन्त्रीले भने ।