आयोग गठनबारे एमालेसँग बस्नुअघि सत्तापक्षको छुट्टै छलफल

सुन तस्करी छानबिनका लागि उच्चस्तरीय आयोग गठनका सम्बन्धमा प्रमुख प्रतिपक्षी नेकपा एमालेको नयाँ शर्तबारे सत्तापक्षका नेताहरुले छलफल गरेका छन् । 

आज बिहान  सिंहदरबारस्थित रक्षा मन्त्रालयमा कार्यवाहक प्रधानमन्त्री तथा रक्षामन्त्री पूर्णबहादुर खड्काको अध्यक्षतामा छलफल भएको हो । छलफलमा उपप्रधानमन्त्री तथा गृहमन्त्री नारायणकाजी श्रेष्ठ, नेपाली काँग्रेसका प्रमुख सचेतक रमेश लेखक, माओवादी केन्द्रका प्रमुख सचेतक हितराज पाण्डेलगायतको उपस्थिति रहेको थियो ।

यसअघि शुक्रबार सत्ता र प्रतिपक्षी एमालेका नेताहरुले आयोग गठनबारे छलफल गरेका थिए । तर, भेपमार्फत भएको सुन तस्करीका सम्बन्धमा पनि अनुसन्धान गर्न सक्नेगरी कार्यादेश तोक्नुपर्ने एमालेको अडानमा सत्तापक्ष सहमत नभएपछि आयोग गठन रोकिएको थियो । एमालेको सोही मागबारे समान धारणा बनाउन सत्तापक्षीय नेताहरुले आज बिहानै छलफल गरेका हुन् । 

गत साउन ३ गते त्रिभुवन अन्तराष्ट्रिय विमानस्थल भन्सार कार्यालयबाट बाहिरिएको ६१ किलो सुन सिनामंगलबाट बरामद बहेको थियो । उक्त प्रकरणमा उपप्रधान तथा गृहमन्त्री श्रेष्ठ र अर्थमन्त्री डा. प्रकाशशरण महतको संलग्नता रहेको आरोप लगाएको एमालेले उच्चस्तरीय छानविन आयोगको माग गर्दै लामो समय सदन अवरुद्ध पारेपछि संसदमा रहेका सात दलबीच आयोग गठन गर्ने सहमति भएको थियो । 

सिआइबीले अनुसन्धान टुंगोमा पुर्याएपछि असोज ५ गते आयोग गठन गर्ने सहमति थियो । तर, एमालेले कार्यादेशलाई लिएर नयाँ शर्त अघि सारेपछि आयोग गठन हुन सकेको छैन ।