भैंसेपाटी बस्ने सर्वसाधारण ठग्ने बैतडीका रमेश कीर्तिपुरमा भेटिए

वैदेशिक रोजगारीमा माल्टा पठाउने विश्वास दिलाएर रकम असुल्दै आएका एक जना दलाल प्रहरीको फन्दामा परेका छन् । काठमाडौँ उपत्यका अपराध अनुसन्धान कार्यालयबाट खटिएको टोलीले ठगीको आरोपमा उनलाई आज पक्राउ गरेको हो । 

पक्राउ पर्नेमा बैतडीको दशरथचन्द नगरपालिका घर भएका र हाल ललितपुरको भैंसेपाटी बस्ने ३५ वर्षीय रमेश बडु हुन् । कुम्भराज जोशीसमेत पाँच जनालाई माल्टा पठाइदिने वाचा गरी रकम हात पारेपछि उनी बेपत्ता भएका थिए । 

प्रहरीका अनुसार माल्टामा आकर्षक जागिर पाइने आश्वासनमा रमेशले प्रतिव्यक्ति साढे ७ लाखको हिसाब देखाएर पीडितसँग किस्ताबन्दीमा १३ लाख १५ हजार उठाएका थिए । पैसा लिएपछि काम गर्न नसकेका उनी त्यसपछि फरार भएको प्रहरीको भनाई छ । 

आफू ठगिएको थाहा पाएपछि पीडितले उनलाई पक्राउ गरिदिन आग्रह गर्दै वैदेशिक रोजगार विभागमा उजुर गरेकोमा त्यसैका आधारमा प्रहरीले आज कीर्तिपुरबाट पक्रेको हो । यस सम्बन्धमा थप अनुसन्धान गरेर आवश्यक कारवाहीको निम्ति प्रहरीले रमेशलाई वैदेशिक रोजगार विभागको जिम्मा लगाएको छ ।