गाडीको ठक्करबाट सशस्त्र प्रहरीको मृत्यु, दशरथ चन्द मार्ग अवरुद्ध

बैतडीमा गाडीको ठक्करबाट एक जना सशस्त्र प्रहरीको मृत्यु भएको छ । बैतडीको पाटन नगरपालिका–८, हरिचनका सशस्त्र प्रहरी हवल्दार ४० वर्षीय नरेन्द्रसिंह महराको मृत्यु भएको बताइएको छ । उनी बाजुरास्थित आश्रित गुल्ममा कार्यरत थिए । 

उनलाई आज बिहान गाडीले ठक्कर दिएको र घटनास्थलमै मृत्यु भएको जिल्ला प्रहरी कार्यालयले जनाएको छ । 

बाजुराबाट घर आएका महरा खोड्पे बजारमा झरेर हिँड्दै गरेको अवस्थामा गाडीले ठक्कर दिएको हो । मृतकका आफन्तले गाडीको पहिचान गर्नुपर्ने र चालकलाई कारबाही गर्नुपर्ने माग राख्दै दशरथचन्द राजमार्ग अवरुद्ध पारेका छन् ।