बिरामीको पेटमा लकेट, चेन, नट, बोल्ट भेटिएपछि डाक्टर नै चकित

नट बोल्ट, सेफ्टी पिन, लकेट, इयरफोन, स्क्रू जस्ता कुरा खान मिल्छ ? तपाइको सहज जवाफ हुन्छ, 'मिल्दैन !' तर, भारतको पञ्जाबमा एउटा यस्तो घटना बाहिर आयो, जुन कसैले पनि विश्वासै गर्न सक्दैन । पञ्जाबस्थित मोगाका ३५ वर्षीय कुलदीप सिंहको पेटबाट सेफ्टी पिन, म्याग्नेट, शर्टको बटन र जिपलगायतका बस्तुहरु निकालिएपछि दुनियाँ चकित पर्ने यो घटना सार्वजनिक भएको हो । 

कुलदिप दुई वर्षदेखि पेट दुख्ने र ज्वरोबाट पीडित थिए । धेरै ठाउँमा उपचार गराए पनि निको नभएपछि २६ सेप्टेम्बरका दिन उनी जचाउँन अस्पताल गए । जब एक्सरे रिपोर्टमा उनको पेटभित्र विभिन्न किसिमका अखाद्य वस्तु भेटियो । अस्पतालका निर्देशक अजमेर सिंह कालराले एक्सरे गरेपछि पेटभित्र लकेट, चेन, नट, बोल्ट, इयरफोनलगायत अन्य धेरै वस्तु भेटिएको बताए । ‘त्यसपछि हामीले उनको शल्यक्रिया गर्ने निर्णय गर्‍यौं,’ उनले भने । 

करिब तीन घण्टासम्म चलेको उक्त शल्यक्रिया शल्य चिकित्सक अनुप हाण्डा र ग्यास्ट्रोएन्टेरोलॉजिस्ट डा. विश्वनुर कालराले गरेका थिए । कुलदीपलाई 'पिका डिसअर्डर' रहेको डा. कालराले बताए । धारिलो वस्तु खाएकोले उनको पेटमा गहिरो चोट लागेको थियो । शल्यक्रिया सफल भए पनि उनी भेन्टिलेटरमा छन् र अवस्था चिन्ताजनक छ । 

‘उनको लक्षणका आधारमा हामीले उनको एक्सरे गर्‍यौं । एक्स–रे र एन्डोस्कोपी गरेपछि पेटमा सिक्का भेटियो त्यसपछि हामीले उनको अपरेशन गर्ने निर्णय गर्‍यौं । पेट एकदमै फुलेको थियो । पेटका विभिन्न ठाउँमा धेरै सिक्का अड्किएका थिए । दुई घण्टाको शल्यक्रियापछि हामीले सबै सिक्का निकाल्यौं। अहिले बिरामीको अवस्था स्थिर छ’ डाक्टरले भने ।

 बिरामीका आफन्तले भने गैरखाद्य पदार्थ सेवन गरेको थाहा नभएको जनाएका छन्।