भूकम्पबाट बाजुरामा १० घरमा पूर्ण क्षति

आज दिउँसो बझाङमा गएको भूकम्पका कारण बाजुरामा १० घरमा पूर्ण क्षति भएको विवरण प्राप्त भएको छ । 

प्रहरीका अनुसार खप्तड छेडेदह गाउँपालिका–३, टुनिसैनका पाँच घर, बडिमालिका नगरपालिका ९ मा तीन वटा र वडा नम्बर ५ मा एक घर भत्किएको छ । त्रिवेणी नगरपालिकामा पनि एउटा घर पूर्ण क्षति भएको छ । 

हालसम्म एउटा विद्यालय पूर्ण रुपमा क्षतिग्रस्त भएको समाचार प्राप्त भएको छ । बुढिगंगा नगरपालिकामा रहेको महेन्द्र आधारभूत विद्यालयको भवन पूर्ण रुपमा क्षति भएको बताइएको छ ।

आज दिउँसो बझाङ केन्द्रविन्दु बनाएर दुई वटा शक्तिशाली भूकम्प गएको थियो । भूकम्पको धक्का राजधानी काठमाडौं र भारतको नयाँ दिल्लीसम्म महशुस गरिएको थियो ।