हाङ्चौ एसियाडका पदक विजेता खेलाडी काठमाडौंमा, चार सांसद पनि फिर्ता

चीनको हाङ्चौमा सम्पन्न १९ औं एसियाली खेलकुदमा पदक विजेता नेपाली खेलाडीहरु स्वदेश फर्किएका छन् । 

पदक विजेता खेलाडी, प्रशिक्षक, अफिसियल र राष्ट्रिय खेलकुद परिषद् (राखेप) का सदस्य सचिव टंकलाल घिसिङ एयर चाइनाको विमानमा आज बिहान साढे ११ बजे काठमाडौँ आइपुगेका हुन् । यस पटकको एसियाली खेलकुदमा नेपालले २ रजत र १ काँस्य पदक जितेको छ ।

पदक बिजेता खेलाडीलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ । उनीहरूलाई विशेष स्कर्टिङसहित राष्ट्रिय खेलकुद परिषद् कार्यालय लगिएको छ ।

सोही उडानमा चीन भ्रमणमा गएका सांसदहरु पनि फर्किएका छन् । सांसदहरु देवेन्द्र पौडेल, दिपा शर्मा, बद्रिप्रसाद पाण्डे र अरूणकुमार चौधरी चीनबाट फर्किएका हुन् ।