मुख्यमन्त्री माग्दै एमालेसहित काँग्रेसका विद्रोही सांसदहरु प्रदेश प्रमुखको दैलोमा

नेपाली काँग्रेसका विद्रोही सांसद केदार कार्कीलाई मुख्यमन्त्रीमा समर्थन गरेका ४७ सांसद प्रदेश प्रमुखको कार्यालय पुगेका छन् ।

संविधानको धारा १६८ (५) अनुसार सरकार गठनका लागि दाबी पेश गर्न प्रदेश प्रमुखले दिएको समय सकिएलगत्तै कार्कीलाई मुख्यमन्त्री नियुक्त गर्न माग गर्दै उनीहरु त्यहाँ गएका हुन् । कार्कीले आफ्नो दल काँग्रेसका ८ र एमालेका ३९ प्रदेश सांसदको हस्ताक्षरसहित हिजो दाबी पेश गरेका थिए ।

यता, काँग्रेससहित एकीकृत समाजवादी र जसपाको समर्थन पाएका माओवादी केन्द्रका संसदीय दलका नेता इन्द्र आङ्बोले पनि मुख्यमन्त्रीमा दाबी प्रस्तुत गरेका छन् । हिजो अपरान्ह कार्कीले दाबी पेश गर्नुअघि आङ्ग्बोले चारवटै पार्टीको संसदीय दलको तर्फबाट प्राप्त समर्थनको कागज प्रदेश प्रमुखलाई बुझाएका थिए । 

दुबैको दाबी परेपछि प्रदेश प्रमुख परशुराम खापुङले कसैलाई पनि मुख्यमन्त्री नियुक्त् गरेका छैनन् । थप छलफल गरेर मात्र निर्णय गर्ने मनस्थितिमा उनी रहेको बताइएको छ ।

कार्की तत्काल मुख्यमन्त्री नियुक्त नहुने संकेत बुझेपछि एमाले र काँग्रेसका विद्रोही सांसदहरु प्रदेश प्रमुखलाई दबाब दिन प्रदेश प्रमुखको कार्यालय पुगेका हुन् ।