धनगढी पुगेपछि प्रधानमन्त्री पूर्व लाग्नुभयो, जसपा अध्यक्ष यादव दक्षिण

प्रधानमन्त्री पुष्पकमल दाहाल प्रचण्ड आज बिहान धनगढी पुगेर विभिन्न कार्यक्रममा सहभागी हुनुभएको छ । श्री एअरलाइन्सको उडानमा बिहान सवा १० बजेको समयमा धनगढी विमानस्थलमा उत्रिएपछि उहाँ लम्की चुहा नगरपालिकातर्फ जानुभएको हो । 

दिउँसो २ बजे धनगढीमा आयोजना हुने समाजवादी मोर्चाको सन्देश सभालाई सम्बोधन गर्नुअघि उहाँ विभिन्न कार्यक्रममा सहमागी भइरहनुभएको छ । प्रधानमन्त्री दाहाल सभाको निम्ति जसपा अध्यक्ष उपेन्द्र यादवसहित एक दर्जन नेता तथा कार्यकर्तासँगै त्यता जानुभएको हो । 

विमानस्थलबाट प्रधानमन्त्री बा. २ झ  ३८९३ नम्बरको सवारी साधनमा लम्की चुहा नगरपालिका ५ चौरतर्फ प्रस्थान गर्नुभएको थियो । त्यहाँ माओवादी पार्टीको सुदूरपश्चिम प्रदेश उपाध्यक्ष स्वर्गीय कृष्ण बडुवालको स्मृतिमा आयोजित श्रद्धाञ्जली सभामा हुनुभएको बताइन्छ । 

सोही क्रममा घोडाघोडी नगरपालिका १, सुखडमा रहेको घोडाघोडी बहुमुखी क्याम्पसको शैक्षिक भवन शिलान्यास र कैलालीको गौरिगंगा नगरपालिका १, चौमालास्थित गौरीगंगा नगरपालिकाको प्रशासकीय भवन उद्घाटन गर्नुभएको छ । 

अब केहीबेरमा धनगढीको चटकपुरस्थित एउटा पार्टी प्यालेसमा गर्न लागिएको समाजवादी मोर्चाको सन्देश सभालाई सम्बोधन गर्ने कार्यक्रम छ  ।

पूर्व उपप्रधानमन्त्री तथा जसपा अध्यक्ष धनगढी विमानस्थलबाट बा.२ झ १९७७ नम्बरको गाडीमा स्थानीय सनलाइट होटल जानुभएको थियो । २ बजेपछि सभालाई एकीकृत समाजवादीका अध्यक्ष माधवकुमार नेपाललगायतले सम्बोधन गर्ने कार्यक्रम छ ।