विभिन्न ठाउँमा आगलागी, धेरै क्षति

मोरङमा भएको आगलागीमा लाखौंको धनमाल क्षति भएको छ । पथरी शनिश्चरे नगरपालिका ८, बस्ने उतम राईको घरमा आगलागी हुँदा १० लाख रुपैयाँ बराबरको धनमालको क्षति भएको बताइएको छ । 

हिजो दिउँसो विद्युत सर्ट भई आगलागी हुँदा घरमा भएका विभिन्न धनमाल जलेर नष्ट भएको हो । यस्तै, सुनसरी र अछाममा पनि आगलागी हुँदा निकै क्षति भएको प्रहरीले जनाएको छ । 

जसअनुसार सुनसरीको कोशी गाउँपालिका १, लौकही बजारका रविन्द्र मुखियाको मोबाइल पसलमा विद्युत सर्ट भई गएराति आगलागी हुँदा करिब सात लाख रुपैयाँ बराबरको धनमाल जलेको छ । 

अछामको रामारोशन नगरपालिका ३, धामीबाडा बस्ने ललित जंग खत्रीको पसलमा पनि हिजो साँझ आगलागी भएको छ । तर, आगलागीबाट भएको क्षतिको विवरण प्राप्त भइसकेको छैन । 

उक्त आगलागी स्थानीय बासिन्दा र दमकलको सहयोगमा नियन्त्रणमा लिइएको थियो । सबै घटनाको आवश्यक अनुसन्धान भइरहेको छ ।