जीप दुर्घटनामा मृतकको संख्या सात पुग्यो, क्षमताभन्दा दोब्बर यात्रु प्रमुख कारण

उदयपुरमा भएको जीप दुर्घटनामा मृत्यु हुनेको संख्या सात पुगेको छ । धरानबाट भोजपुरको दक्षिण घोरेटारतर्फ जाँदै गरेको जीप दुर्घटनामा तीन पुरुष, तीन महिला र एक बच्चाको निधन भएको प्रहरीले जनाएको छ ।

जिल्ला प्रहरी कार्यालय भोजपुरका अनुसार को.१ ज २५९३ नम्बरको जीप उदयपुरको बेलका–७ बाखाकुवामा दुर्घटनामा परेको हो । घाइतेलाई थप उपचारका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ । 

जीपमा १४ जना सवार रहेको र ओरालोमा दुर्घटनाग्रस्त भएको बताइन्छ । सडकबाट झण्डै तीन सय मीटर तल खसेको जीपका चालक मानबहादुर बस्नेतको पनि निधन भएको बताइएको छ । प्रहरीका अनुसार मृतक अन्यको सनाखत भएको छैन ।