रविको बचाउमा एमाले, सरकार ढाल्ने योजना बनाएको आरोप

नेकपा एमालेका प्रमुख सचेतक महेशकुमार बर्तौला गृहमन्त्री तथा राष्ट्रिय स्वतन्त्र पार्टीका सभापति रवि लामिछानेको बचाउमा उत्रिएका छन् । 

सहकारी ठगी प्रकरणमा मुछिएको व्यक्ति मन्त्री हुन नपाउने भन्दै नेपाली कांग्रेसले विरोध गरिरहेका बेला सत्तारुढ दलका युवा नेताले यसरी बचाउमा बोलेका हुन् । कांग्रेसले सरकार ढाल्ने योजनाअन्तर्गत रास्वपा नेतृत्वको बिरोध गरेको पनि बर्तौलाको आरोप छ । 

संसद भवन परिसरमा सञ्चारकर्मीहरुसँग कुरा गर्दै उनले गृहमन्त्रीलाई आक्रमण गरेपछि सरकार ढाल्न सकिन्छ भन्ने अंक गणितका आधारमा लान्छना लगाइएको दावी गरे । २८ दिनभित्र सरकार ढाल्छौँ भन्ने कांग्रेसको अभिव्यक्तिको पनि उनले निन्दा गरेका छन् । 

'रास्वपाको नेतृत्वलाई बदनाम गर्ने,टिक्न नसकेपछि यो सरकार ढाल्न सकिन्छ भन्ने ध्येयका साथ एक महिनाभित्र सरकार ढाल्छौँ भनिरहनुभएको छ । अनुसन्धानले सबै किसिमको छानबिनबाट उहाँ दोषी हुँदा उहाँलाई कसैले जोगाउनुपर्छ भन्ने छैन', उनले भने, 'कोही प्रधानमन्त्री र गृहमन्त्री भयो भन्दैमा सारा अंग प्रभावित हुन्छ भन्ने सोच्नु हुँदैन । यो सरकारलाई उहाँहरुले २८ दिनको म्याद दिनुभएको छ ।’

सुन तस्करी प्रकरणको सन्दर्भमा जाँचबुझ आयोगले दिएको प्रतिवेदनको पूर्ण कार्यान्वयन हुनुपर्नेमा बर्तौलाको जोड छ । आयोगको प्रतिवेदन सांसदहरुलाई बुझाउन पनि उनले सरकारसँग आग्रह गरे ।

‘सुन तस्करी प्रकरणको सन्दर्भमा आयोगले सरकारलाई रिपोर्ट पेश गरेको छ । त्यो रिपोर्ट बमोजिम जो-जसको जहाँ जहाँ जसरी संलग्नता छ,दोषको आधारमा कानूनी कारबाही हुन्छ । प्रतिवेदनले उजागर गरेका विषयवस्तु सार्वजनिक गर्नुपर्छ । हामीले सरकारलाई संसदमार्फत ध्यानाकर्षण गराएका छौँ',उनले भने ।