विनोद चौधरीको बयान आज, बसन्तको कागज हिजो

विवादास्पद व्यवसायी तथा नेपाली काँग्रेसका सभासद विनोद चौधरीसँग प्रहरीको केन्द्रीय अनुसन्धान ब्यूरो (सिआईबी) ले आज बयान लिएको छ । सिआईबीले माहिलो भाइ वसन्तसँग हिजै बयान कागज गराइसकेको स्रोतको दावी छ । 

तत्कालीन बाँसबारी छाला जुत्ता कारखानाको १० रोपनी सरकारी जग्गा हिनामिना प्रकरणको अनुसन्धान र छानबिनको क्रममा उनीसँग बयान लिइएको बताइएको छ । ब्यूरोले प्रतिनिधिसभाका सभामुख देवराज घिमिरेलाई उनीमाथि अनुसन्धान भइरहेको पत्र हिजो पठाएपछि बयान लिइएको हो । 

ब्यूरो स्रोतका अनुसार चौधरीका तीन भाइमध्ये वसन्तसँग हिजै बयान लिइएको हो । चार दशकअघि विनोद संस्थापक रहेको च्याम्पियन फुटवेयर कम्पनीले कारखानाको १० रोपनी जग्गा गैरकानुनी ढंगले हात पारेर आफ्नो स्वामित्व कायम गरेको थियो ।

अहिले कान्छा भाई अरुणको नाममा रहेको भनिएको सो स्थानको चाँदबाग रेसिडेन्सी कम्पनीको जग्गामा विनोदको चौधरी फाउण्डेसनले चाँदबाग स्कुल सञ्चालन गरेको छ । २५ लाख रुपैयाँ बराबरको च्याम्पियनको सेयर कारखानालाई दिएर उक्त जग्गा लिइएको थियो । कालान्तरमा छाला जुत्ता कारखानालाई ८ लाख रुपैयाँ दिएर उक्त सेयर पनि विनोदले नै हत्याएको अनुसन्धानबाट खुलेको छ ।

त्यतिबेला चौधरीका तीन जना दाजुभाईबीच अंशबण्डा नै भएको थिएन । ५० को दशकमा अंशबण्डा हुँदा उक्त कम्पनी कान्छा अरुणको भागमा परेको थियो ।

उच्च स्रोतका अनुसार यो प्रकरणको अनुसन्धान टुंगोमा पुग्न कम्तीमा डेढ महिना लाग्ने छ । चौधरीपछि कम्पनीका अन्य सञ्चालकहरुसँग पनि बयान लिने तयारी सीआईबीले गरेको बुझिएको छ ।