दौरा सुरुवालमा सजिएकाकाे नारा ‘उधारो पेन्सन अन्त्य गर’

राष्ट्रिय प्रजातन्त्र पार्टी (राप्रपा) निकट भूतपूर्व सैनिक संगठनले काठमाडौंमा प्रदर्शन गरेको छ । पूर्व सुरक्षाकर्मीहरुको पहिचान र हकहितको लागि दबाबपूर्ण र्याली निकालिएको बताइएको छ । भृकुटीमण्डपबाट सुरु भएको र्याली सुन्धारा, रत्नपार्क, पुतलीसडक हुँदै पद्यमोदय स्कूलअगाडि पुगेर सभामा परिणत भएको थियो । 

दौरा सुरुवाल र ढाका टोपी लगाएका प्रदर्शनकारीहरुले ‘१६ वर्षे पेन्सनको सुनिश्चितता गर’, ‘राष्ट्र निर्माताको सम्मान गरौं’, ‘धर्म र संस्कारको परिवर्तन राष्ट्रियताको अन्त्य हो’, ‘उधारो पेन्सन अन्त्य गर’, ‘युवा पलायनले देश बन्दैन, नेता मात्र बन्छ’ लगायत नारा लेखिएका प्लेकार्ड बोकेका थिए । 

राप्रपाले पर्सि काठमाडौंमा बृहत् आन्दोलन गर्दैछ । त्यसकै पूर्वसन्ध्यामा पेन्सन अर्थात् निवृत्तिभरण प्राप्त अवकाशप्राप्त सैनिकहरुलाई सडकमा उतारेको हो ।