कारबाहीको मागमा माधव नेपालको अभिनय, केपी ओली प्रधानमन्त्रीको भूमिकामा

नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले अभिनय गरेको चलचित्र ‘नमेटिने घाउ’ को सुटिङ सकिएको छ । आज ललितपुरको च्यासलस्थित एमाले मुख्यालयमा ओलीसँग सम्बन्धित दृश्य खिचेसँगै छायाँकन सम्पन्न भएको जनाइएको छ । 

निर्देशक तथा अभिनेता रमित ढुंगानाले चलचित्रमा ६५ जना कलाकार रहेको र आज अध्यक्ष ओलीले अभिनय गरेसँगै ५१ औं दिनमा छायांकनसमेत सकिएको बताए । फिल्ममा अध्यक्ष ओलीलाई प्रधानमन्त्रीको भूमिकामा प्रस्तुत गरिएको छ । उहाँले एसिड पीडितको पक्षमा कानुन बनाउन भूमिका खेलेको दृश्य चलचित्रमा राखिने छ ।

‘नमेटिने घाउ’ एसिड सर्भाइभर मुस्कान खातुनको जीवन कथामा बन्न लागेको हो । चलचित्रमा नेकपा एकीकृत समाजवादीका अध्यक्ष एवम् पूर्वप्रधानमन्त्री माधवकुमार नेपालको पनि अभिनय छ । 

चलचित्रको कथाअनुसार विद्यार्थीहरुले ‘एसिडको प्रयोगमा रोक लगाउ र एसिड आक्रमणकारीलाई कारवाही गर’ लगायत नारासहित प्रदर्शन गरेपछि अध्यक्ष नेपालले उक्त प्रदर्शनलाई सम्बोधन गरेको दृश्य केही दिनअघि कोटेश्वर क्षेत्रमा खिचिएको हो । उहाँले एसिड आक्रमण गर्नेलाई तत्काल कारबाही गरिने आशयसहितको संवादमा अभिनय गर्नुभएको बताइएको छ ।

सामाजिक कथावस्तुमा आधारित फिल्म काठमाडौँसहित पोखरा, नवलपरासी, वीरगञ्ज, रौतहट, बनेपा, पनौती र भक्तपुरमा छायांकन गरिएको थियो ।