सभामुखको मर्यादा नराखेको भन्दै गगनसँग केपी ओली क्रुद्ध

नेकपा एमालेका अध्यक्ष केपी शर्मा ओलीले नेपाली काँग्रेसका महामन्त्री गगनकुमार थापाले केही दिनअघि संसद बैठकमा दिएको एउटा अभिव्यक्तिप्रति चर्को आक्रोश पोख्नुभएको छ । 

वैशाख २८ गते बसेको प्रतिनिधि सभाको बैठकमा थापाले सभामुख देवराज घिमिरेलाई 'निगाहाको समय चाहिंदैन' भनेकोमा उहाँ आक्रोशित हुनुभएको हो । थापा अशिष्ट ढंगले प्रस्तुत भएको र संसदमा उदण्डता देखाएको ओलीको आरोप छ  ।

उक्त बैठकमा बोल्न थापालाई शुरुमा तीन मिनेटको समय उपलब्ध गराइएको थियो । पछि सभामुखले अरु दुई मिनेट समय थपिदिएको बताएपछि उहाँले निगाहाको हैन हकको समय चाहिने अभिव्यक्ति दिनुभएको थियो । 

आज दिउँसो संसदीय दलको बैठकमा बोल्दै अध्यक्ष ओलीले थापाको उक्त अभिव्यक्तिको निन्दा गर्नुभयो । सभामुखले बोल्न समय दिँदा 'तपाईको निगाहाको समय चाहिँदैन भन्ने' कुराले उदण्डता प्रदर्शन भएको उहाँको भनाई छ । 

'सभामुखले मैले तपाईलाई समय दिएँ भन्दा तपाईको निगाहाको समय चाहिँदैन भनेर उदण्डता प्रदर्शन गर्ने संसदमा । सभामुखसँगको के भाषा हो नेपाली काँग्रेसको ?', आक्रोसित हुँदै ओलीले प्रश्न गर्नुभयो, 'सभामुखसँग त्यस्तो भाषाले प्रस्तुत भएर यो संसद चलाउने खोजेको हो नेपाली काँग्रेसले ? काँग्रेस एकदलीय, एकाधिकारवादी, तानाशाही चलाउन खोज्छ कि बहुदलीय व्यवस्था चलाउन खोज्छ ?'

कांग्रेसले सहअस्तित्व र पारस्परिक मर्यादा बुझ्न नसकेको टिप्पणी गर्नुभएका उहाँले आफ्नो राजनीतिक अभिष्ट पूरा नभएपछि अरुलाई अपराधि करार गर्न खोजिरहेको आरोप पनि लगाउनुभयो । 

त्यसक्रममा ओलीले गृहमन्त्री रवि लामिछानेले संसद बैठकमा बोल्न पाउनुपर्ने पुरानै अडानसमेत दोहोर्याउनुभएको थियो । गृहमन्त्रीलाई आरोपित गरिएकाले आफ्नो सफाइ दिन पाउनुपर्नेमा कांग्रेसले बाधा गरिरहेको उहाँको आरोप छ ।