राष्ट्रिय झण्डा बोकेर राष्ट्रभक्तिको गीत गाउँदा गाउँदै मञ्चमै ढले बलबीर

भारत मध्य प्रदेशको इन्दोर शहरस्थित एउटा योगा कक्षामा प्रस्तुति दिँदा दिदै एक जनाको निधन भएको छ । राष्ट्रभक्तिको गीतमा प्रस्तुति दिइरहेका बलवीर सिंह छाब्रा एकाएक ढले पनि अरु सहभागी भने यसलाई पनि उनको प्रस्तुतिकै एउटा अँश सम्झेर ताली बजाइरहेका थिए ।

७३ वर्षे बलवीर योगासङ्गै हिजो बिहान राष्ट्रभक्तिको गीतमा प्रस्तुति दिइरहेका थिए । सहभागी अरुले करतल ध्वनीका साथ ताली बजाइरहेका थिए । हातमा भारतको झण्डा बोकेर प्रस्तुति दिइरहेका उनी मञ्चमा ढले तर, योगामा सहभागीहरुले त्यो पनि उनको प्रस्तुति नै ठानेर ताली बजाइरहे ।

चिकित्सकहरुका अनुसार उनलाई हृदयाघात भएको थियो । सैनिक पोशाकमा सजिएर राष्ट्रिय झण्डा बोक्दै राष्ट्रभक्तिको गीत गाउँदा गाउँदै मञ्चमा ढलेर देहत्याग गरेको उक्त क्षणको मार्मिक भिडियो सामाजिक सञ्जालमा भाइरल भएको छ ।