चर्तिकला यति चर्को हुँदा पनि अख्तियार चिम्म

दोहोरो नागरिकता बोक्ने भारतीयका नाममा पहिले नै गलत तरिकाबाट दर्ता गरिएको जमिन एक वरिष्ठ अधिवक्ताको अग्रसरतामा छलछामपूर्ण रूपले फेरि बेचबिखन गरिएको छ ।

नेपाली नागरिकता लिएका तर भारतमै बसोबास गर्ने अल्कानन्द सेन गुप्ता, लिपी सेन गुप्ता र उर्मि सेन गुप्ताका नाममा जावलाखेलको आनाकै ९० लाखभन्दा बढी पर्ने ३ रोपनी ७ आना जग्गा राजीनामाको लिखतबाट हक हस्तान्तरण गरिएको हो ।

जावलाखेलमा राष्ट्रियसभाका पूर्व अध्यक्ष स्व. बेनीबहादुर कार्कीको घर परिसरछेउमै मुख्य सडकसँग जोडिएको सो जमिन लेनदेन गर्दा कारोबार गरिएको ३२ करोडभन्दा बढी रकमको अस्तित्व नेपालमा कतै देखिएको छैन । अदालत र मालपोतका कर्मचारीलाई समेत प्रभावमा पारेर वरिष्ठ अधिवक्ता, पूर्वसांसद तथा बार एसोसिएसनका तत्कालिन अगुवा हरिहर दाहालको अभिनव ल फर्मले बेचबिखनको काम तमाम गरेको हो । 

सेनहरू पश्चिम बंगालका हुन् र सपरिवार उतै बसोबास गर्छन् । कतिपय बेलायतमा पनि छरिएका छन् । तिनैका नाममा रहेको जग्गा ललितपुरका राजा अवाले, कृष्ण अवाले, राम अवाले, श्यामकाजी अवाले र केदार अवालेको नाममा नामा सारी गरिएको हो । त्यस क्रममा अवालेहरूले जग्गावालाका नाममा नभएर पशुपति सेन गुप्ता र विश्व सेन गुप्ताका नाममा चेक काटेका छन् । प्रचलित कानूनबमोजिम जग्गावालाको नाममा चेक वा रकम दिएपछि मात्र नामसारी गर्न पाइन्छ ।

तर डोरका रूपमा खटिएको मालपोत कार्यालयका कर्मचारीले यसतर्फ ध्यान नै नदिई स्वामित्व परिवर्तन गरिदिएका छन् । अर्कातर्फ अवाले बन्धुहरूले दिएको ३० करोडभन्दा बढीको स्ट्याण्डर्ड चार्टर्ड बैंकको चेकबाट सो बैंकमा एक पैसा पनि जम्मा गरिएको छैन । चेक मालपोत कार्यालयलाई देखाउनका लागि मात्र दिइएको र नगद नै रकम लेनदेन गरी हुण्डीबाट पैसा विदेश पठाइएको देखिन्छ ।

राजिनामा पास गर्नका लागि १० लाखभन्दा बढी रकम बैंकमार्फत नै लेनदेन गर्नुपर्ने प्रावधानलाई पनि धज्जी उडाएको पाइएको छ । बैंकसमेत यी सबै गलत कार्यमा सहभागी भएको प्रमाणसहित छानबिनका लागि निवेदन परेपछि फेरि अर्को नक्कली कागजात बनाई विश्व र पशुपतिलाई हकदारका रूपमा देखाइएको छ । यी सबै गलत काम गरिदिएबापत वकिल टोेलीले एकैचोटी ५ करोडभन्दा बढी रकम आर्जन गरेको पनि श्रोतको दाबी छ । लगत्तै निकै महँगो विलासी गाडी खरिद गरेको अवस्था छ । 

अवाले बन्धुहरू विवादित जग्गा लन्ठ्याङमन्ठ्याङ पारेर आफ्नो नाममा दर्ता गर्ने र हकवालाहरूलाई धम्काएरै तह लगाउनमा चर्चित हुन् । राम अवाले बक्सिङ संघको लामो समयदेखिका अध्यक्ष हुन् । पृष्ठभूमिले खाँटी कांग्रेस भए पनि सत्ताधारीसँग सधैँ निकट भइरहन रुचाउने र अहिले आफूलाई खरो माओवादीका रूपमा परिचित गराउँछन् ।

उपत्यकाका विवादमा परेका, मुद्दा चलिरहेका जग्गा कम मूल्यमा लिने र विपक्षीहरूलाई तह लगाउने समूह हो यो । यतिले पनि नपुगे अदालत, नापी तथा मालपोतका कर्मचारीलाई रिझाएर पनि यिनीहरू हकवाला विपक्षीहरूलाई पाखा लगाउन माहिर मानिन्छन् । बक्सिङ संघको अध्यक्षमा कायम रहिरहन राम अवालेले खेलकुद परिषद्का सदस्य सचिव टंकलाल घिसिङलाई घडेरी नै दिएको त्रिपुरेश्वरका चियापसलमा खेलाडीबीच चर्चाको विषय बन्ने गरेको छ । यसबीच, मोहीहरूले जिल्ला अदालतमा हकअधिकारी कायम गरिपाऊँ भनी मुद्दा हालेका छन् । ती निम्सरालाई अदालतले न्याय देला त ?

(साभार:जनआस्था साप्ताहिकबाट)