राप्रपा महिला अध्यक्षद्वारा पार्टी परित्याग, भोटरसमेत नरहेको घोषणा

राष्ट्रिय प्रजातन्त्र पार्टी (राप्रपा) को महिला संगठनकी केन्द्रीय अध्यक्ष अञ्जना शाह रावलले पार्टी परित्याग गरेकी छन् । महामन्त्री राजेन्द्र गुरुङलाई आज राजीनामा पत्र बुझाउँदै उनले महिला संगठनको अध्यक्षसहित पार्टीको साधारण सदस्य र भोटरसमेत नरहेको घोषणा गरेकी हुन् । 

अञ्जना २०७९ असार २ गते महिला संगठनको तदर्थ समिति अध्यक्ष मनोनित भएकी थिइन् । राजीनामा पत्रमा उनले आफूले संगठनको नेतृत्व गरेपश्चात् ५२ जिल्लामा अधिवेशन सम्पन्न गरेको तर, सहकर्मीहरुबाटै असहयोग भएको गुनासो गरेकी छन् । यसबारे पार्टी नेतृत्वलाई जानकारी गराउँदा प्रेरणा प्राप्त हुनुपर्नेमा उल्टै हतोत्साहित बनाएको जनाउँदै रावलले राजीनामाको निर्णय लिएको बताएकी छन् । 

‘संगठनलाई अगाडि बढाई रहँदा मेरा कारणले मेरा सहकर्मी साथीहरुलाई मसँग सहकार्य गर्न असहज पैदा भइरहेको र उहाँहरुको असहयोग रहेको बारेमा पार्टी नेतृत्व र जिम्मेवारी पदाधिकारीहरुलाई बारम्बार जानकारी गराउँदा पनि उत्साह, हौसला र प्रेरणा प्राप्त गर्नुपर्ने ठाउँमा हत्तोत्साहित हुने वातावरण निर्माण भएको हुँदा महिला संगठनलाई सोचेजस्तो ढंगबाट अगाडि बढाउन र संगठनलाई उचाई दिन असमर्थ भएकोले यसको सम्पूर्ण नैतिक जिम्मेवारी लिँदै पार्टीबाट बिदा हुने निर्णय गरेको छु’, राजीनामा पत्रमा भनिएको छ ।

  

अञ्जनाले कोही कसैप्रति कुनै पनि प्रकारको आग्रह, पूर्वाग्रह र गुनासो नरहेको उल्लेख गर्दै थप लेखेकी छन्, ‘मैले खोजेको आदर्श, निष्ठावान पार्टी, सिद्धान्तवादी पार्टी विस्तारै मख्खिदै गएकोले म मा एक प्रकारको बेचैनी थियो । म मा व्यक्तिगत मोह र आकांक्षा केही थिएन । त्यो उकुस मुकुसबाट बाहिर निस्किनको लागि यो अप्रियजस्तो लाग्ने निर्णय लिन बाध्य भएकी छु ।’