सरकारमा गएर गज्जब गरेको रवि लामिछानेको दाबी

राष्ट्रिय स्वतन्त्र पार्टी (रास्वपा) का सभापति तथा गृहमन्त्री रवि लामिछानेले संसदमा २१ सिटको आफ्नो पार्टीले सरकारमा गज्जब गरिरहेको बताएका छन् । सरकारको सय दिनमा आफ्नो पार्टीले गज्जबले काम गर्ने आधार बनाएको उनले दाबी गरेका हुन् । 

पार्टी स्थापना दिवसको अवसरमा घण्टी घरमा आज आयोजित चियापान समारोहपछि लामिछानेले नयाँ राजनीतिक दल भएकाले आफ्नो पार्टीप्रति जनताको धेरै अपेक्षा रहेको र सरकारमा गएर त्यसैगरी काम गरिरहेको बताए । 

‘२१ सीटले सदनमा हामी गज्जबको प्रतिपक्ष भएकै हौँ । सरकारमा एक सय दिन जति भएको छ । गज्जबले सरकार चलाउने आधार बनेका छन्', उनले भने 'नागरिकको अपेक्षा ठूलो छ । त्यो पूरा गर्न ठूलो चुनौती छ । त्यसलाई ख्याल गरेर हामीले इमान्दार कोसिस गर्छौँ ।’

अरु राजनीतिक दलभन्दा आफ्नो पार्टी फरक रहेको जिकिर गर्दै लामिछानेले बिस्तारै परिणामले त्यो कुरा पुष्टि गर्ने जनाए । आम नागरिकको अपेक्षा परिपूर्ति गर्न सरकारमा जानुपर्ने अवस्था आएको पनि उनको भनाई छ ।