वर्तमान सत्ता गठबन्धनमा कुनै समस्या छैनः प्रधानमन्त्री

प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले सत्तारूढ दलहरूबीचको समझदारीअनुरूप नै सत्तासमीकरण अगाडि बढ्ने बताउनुभएको छ ।

पार्टी निकट तामाङ राष्ट्रिय मुक्ति मोर्चाको सातौँ राष्ट्रिय महाधिवेशनलाई सम्बोधन गर्दै प्रधानमन्त्रीले समीकरणमा कुनै समस्या र असमझदारी नरहेको स्पष्ट पार्दै पहिलेको सहमति बमोजिम समीकरण अगाडि बढ्ने बताउनुभएको हो ।

प्रधानमन्त्रीले भन्नुभयो, ‘आजभोलि बजारमा सरकार के हुन्छ, सत्तासमीकरण के हुन्छ भन्नेखालका प्रश्न उठाउन खोजिएको छ । यस्तो प्रचार र आशंका म प्रधानमन्त्री भएको दिनदेखि नै थियो । तर, कुनै समस्या छैन । अहिले पनि सरकार के हुन्छ भन्ने जिज्ञासा र भ्रम देख्छु । तर, केही हुँदैन । हामी समझदारीका साथ नै अगाडि बढेका छौँ । समझदारीका साथ नै अगाडि बढ्छौँ । सत्तासमीकरणमा कुनै समस्या छैन र हुँदैन ।’

प्रधानमन्त्रीले नेपालका जाति जनजातिहरूको त्याग र सकारात्मक योगदानका कारण देशमा ठूलो राजनीतिक परिवर्तन सम्भव भएको बताउनुभयो  । उत्पीडितहरूले जति अधिकार पाएका छन्, त्यो माओवादीले गर्दा नै भएको हो ।’

जनयुद्ध जनताको युद्ध रहेको उहाँको भनाई छ । परिवर्तनका उपलब्धि रक्षा गर्न र समाजवादको आधार तयार पार्न शान्तिपूर्ण राजनीतिक प्रतिस्पर्धासहितको समझदारीमा माओवादी आएको उल्लेख गर्दै भन्नुभयो, ‘यही आधारमा टेकेर समाजवाद तयार गर्छौं ।’

प्रधानमन्त्रीले पार्टी केन्द्रीय समितिको बैठक बोलाउन लागिएको र त्यसले विशेष महाधिवेशनको मिति निर्धारण गर्ने जानकारी दिनुभयो ।