गृहमन्त्रीविरुद्धको मुद्दा हेर्न सपना श्रीमान आज पाकिस्तानबाट फर्कँदै

गृहमन्त्री तथा राष्ट्रिय स्वतन्त्र पार्टीका सभापति रवि लामिछानेविरुद्ध सहकारी ठगीसम्बन्धी हेर्दाहेर्दै रिटको पेशी पर्सिलाई तोकिएको छ ।

न्यायाधीशद्वय सपना प्रधान मल्ल र सारङ्गा सुवेदीको इजलासमा मुद्दा सुनुवाइ नसकिएका कारण असार ७ गते हेर्दाहेर्दैमा राखिएको थियो । न्यायाधीश मल्ल फेडरल जुडिसियल एकेडेमीद्वारा युएन वुमन पाकिस्तानको सहकार्यमा आयोजित दुई वटा कार्यक्रममा सहभागिताका लागि असार १२ गते त्यता जानुभएको थियो । हिजोसम्म चलेको न्यायमा समावेशीसम्बन्धी दक्षिण एसियाली संगोष्ठीलाई सम्बोधन गरेर उहाँ आज स्वदेश फर्कने कार्यक्रम छ ।

सहकारी ठगी प्रकरणमा गृहमन्त्री लामिछानेको संलग्नता रहेको जिकिरसहित उनलाई पदबाट निलम्बनको माग गर्दै अधिवक्ता अनुपम भट्टराईले जेठ १४ गते रिट दायर गरेका थिए । यो मुद्दा यसअघि कहिले हेर्न नमिल्ने, कहिले हेर्न नभ्याइनेमा परेको र दुई पटक सुनुवाई स्थगितसमेत भइसकेको छ ।

शुरुमा सर्वोच्च प्रशासनले रिट दर्ता गर्नै अस्वीकार गरेको थियो । पछि न्यायाधीश टेकप्रसाद ढुंगानाको इजलासले दरपीठविरुद्ध आदेश दिएपछि बल्ल दर्ता भएको हो । जेठ २० मा न्यायाधीश तिलप्रसाद श्रेष्ठको एकल इजलासले पोखराबाट कागजात झिकाउन आदेश दिएको थियो । जेठ २८ गते पनि न्यायाधीश श्रेष्ठ र डा.मनोज शर्माको इजलासले बुटवलबाट थप कागजात झिकाउन आदेश गर्यो । 

उनै रविको राहदानी दुरुपयोगसम्बन्धी मुद्दा अदालतले यसअघि मंसीर १७ लाई सारेको थियो ।