‘प्रधानमन्त्रीज्यूले जे गर्नुहुन्छ,त्यही मान्य’ भन्दै घण्टी टोली बालुुवाटारबाट फिर्ता

राजीनामा बोकेर बालुवाटार पुगेको राष्ट्रिय स्वतन्त्र पार्टीका सभापति रवि लामिछाने नेतृत्वको टोली खल्तीबाट उक्त पत्र नझिकी फर्केको छ । हिजो एमालेका सबै मन्त्रीले सामूहिक राजीनामा दिँदै पार्टीले दिएको समर्थन फिर्ता लिएपछि दबाबमा पर्नुभएका प्रधानमन्त्रीलाई थप दबाब पर्ने भन्दै रविले राजीनामा नदिने मूड बनाएको बालुवाटार स्रोतले पुष्टि गरेको छ । 

प्रधानमन्त्री पुष्पकमल दाहाल प्रचण्डसँग भेट गर्न गएको उक्त टोली करिब दुई घण्टाको छलफलपछि निस्केको हो । प्रधानमन्त्रीले तत्काल राजीनामा नदिन गरेको आग्रहलाई रास्वपाका नेताहरुले स्वीकार गरेका छन् ।

‘३० दिनसम्म किन कुर्ने ? संसदमा आफ्ना कुरा राखेर तपाई (रवि) हामी सँगसँगै छाडौंला ।’

छलफलमा सहभागी रास्वपाका एक जना नेताले भने, ‘प्रधानमन्त्रीले पहिले संसद बैठकमा आफ्ना कुरा राख्छु भन्नुभयो । त्यसका लागि ३० दिन कुर्नैपर्ने भन्नै छैन । तर, संसद बैठक आगामी मंगलबार यता बस्ने कार्यसूची छैन ।’

संसदको बैठकबारे सोधनी गर्ने क्रममा बालुवाटारबाट संसदका महासचिव पदमप्रसाद पाण्डेयलाई फोन गरिएको थियो । उताबाट २५ गतेसम्म संसद सचिवालयको अन्य व्यस्तताले गर्दा २५ गतेपछि मात्रै बैठक हुने जानकारी दिइएको थियो । तर, प्रधानमन्त्रीले विश्वासको प्रस्ताव पेश गर्न आजदेखि ३० दिने काउन्ट डाउन शुरु भएको छ ।

प्रधानमन्त्रीको भनाई उद्धृत गर्दै बालुुवाटार स्रोतले भन्यो, ‘३० दिनसम्म किन कुर्ने ? संसदमा आफ्ना कुरा राखेर तपाई (रवि) हामी सँगसँगै छाडौंला ।’ प्रधानमन्त्रीको उक्त भनाईपछि रविले मुन्टो हल्लाउँदै ‘हस्’ भनेका थिए ।