अमेरिकी कर्जा मिलाइदिने नाममा ठग्दै हिँडेका खतिवडा प्रहरी खोरमा
कृषिका लागि कर्जा मिलाइदिने आश्वासनमा ठगेको आरोप लागेका एक जना पक्राउ परेका छन् । काठमाडौंको नागार्जुन नगरपालिका–९, दुर्गानगर कोलोनी बस्ने ५५ वर्षीय नारायणप्रसाद खतिवडालाई प्रहरीले नियन्त्रणमा लिएको छ ।
उनले ऋण मिलाइदिने आश्वासनमा पीडितबाट झण्डै साढे १७ लाख रुपैयाँ ठगेको प्रहरीको अनुसन्धानबाट खुलेको छ । उक्त कार्यमा हाल फरार रहेका विष्णु एण्ड सोनी प्रालिका सञ्चालक विष्णुबहादुर कार्कीको पनि संलग्नता रहेको प्रहरीले जनाएको छ ।
खतिवडाले आफ्नो कार्कीसँग चिनजान रहेको र उनले कृषि फर्मको नाममा अमेरिकाबाट १० लाख ९९ हजार ८९८ अमेरिकी डलर (नेपाली १४ करोड ५१ लाख ९८ हजार ५४८ रुपैयाँ) साढे दुई प्रतिशत ब्याजदरमा कर्जा मिलाइदिने बताएका थिए ।
त्यसपछि विभिन्न कागजात तयार पारेर पीडितसँग ग्यारेन्टीका लागि फर्मको नाममा रहेको चेक कार्कीको नाममा पटकपटक लेख्न लगाई १७ लाख ३१ हजार रुपैयाँ ठगेको पाइएको हो ।
काठमाडौं जिल्ला अदालतबाट पक्राउ पुर्जी जारी भइसकेका खतिवडालाई खोजतलास गर्ने क्रममा आज दिउँसो १ बजे भद्रकालीबाट नियन्त्रणमा लिइएको उपत्यका अपराध अनुसन्धान कार्यालयले जनाएको छ । उनलाई थप अनुसन्धान तथा कारबाहीका निम्ति जिल्ला प्रहरी परिसर भद्रकाली पठाइएको छ ।
ट्रेन्डिङ पोस्ट
टिप्पणीहरू