चलचित्र फ्लप, अभिनेत्रीको हातमा नयाँ फिल्मको लाइन–अप

पछिल्लो समय नेपाली कलाकारमा एउटा जबर्जस्त मनोविज्ञान स्थापित भइरहेको छ– चलचित्र चलोस् वा नचलोस्, आफ्नो पब्लिसिटी हुनुपर्यो ! यसरी चलिरहेका थुप्रै कलाकारमध्ये एक हुन्, नीति शाह ।  

सामान्यतया नयाँ कलाकारको डेब्यु चलचित्र फ्लप हुँदा करिअर नै जोखिममा पर्छ । दीपिका प्रसाईं, आकाश श्रेष्ठ, सलिनमान बानियाँलगायत थुप्रै कलाकारको डेब्युसँगै करिअर पनि ध्वस्त भएको उदाहरण छ । तर, नीति भने अपवाद बनेकी छन् ।   

चलचित्र फ्लप भए पनि उनको हातमा नयाँ चलचित्रको लाइन–अप भने घटेको छैन । यसलाई कतिपयले ‘नीतिको सुन्दरताको कमाल’ भन्न थालेका छन् । 

नीति अभिनित पहिलो ‘खजुरे ब्रो’ सुपर फ्लप भयो । करिब दुई करोडमा बनेको चलचित्रले नाफा त धेरै परको कुरा आधा लगानीसमेत उठाउन नसकेको सिनेवृत्तमा चर्चा छ । दोश्रो चलचित्र ‘ज्वाइँ साब’ प्रदर्शनको तयारीमा छ । यसको पनि भविष्य त्यति सुरक्षित नदेखिएको बताइन्छ । दिपकराज गिरीको ‘छक्का पञ्जा ५’ र विराज भट्टको कमब्याक चलचित्र ‘१२ गाउँ’ सँग ‘ज्वाईं साब’ को प्रदर्शन जुध्दैछ । 

महानायक राजेश हमालले कमब्याक गर्न लागेको भनिएको चलचित्र ‘नरसिंहा अवतार’मा नीति अनुबन्धित भइसकेकी छन् । त्यसलगत्तै अहिले नयाँ चलचित्र ‘अज्ञात’मा पनि उनले हस्ताक्षर गरेको खबर बाहिरिएको छ ।

सौगात मल्ल र अनुपविक्रम शाहीले शीर्ष भूमिका निभाउन लागेको अज्ञातमा नीतिको रोलबारे निर्माण पक्षले खुलाएको छैन । तर, पहिलो पटक स्थापित कलाकारसँग स्क्रीन शेयर गर्न लागेकाले उनको करिअरमा यो चलचित्र महत्वपूर्ण हुने ठानिएको छ । 

यहाँ नीतिको मात्र हैन कुरो दिलिप रायमाझीकी छोरी दिव्या रायमाझीको पनि हो । सूचना प्रविधिको सरल पहुँचले अहिले निर्माता तथा निर्देशकहरुलाई नयाँ कलाकार खोज्न कठिन छैन । टिकटक, फेसबुक, यूटुब, इन्स्टाग्रामबाट कलाकार छनोट हुन्छन् । यो मामलामा दिव्या पनि भाग्यमानी ठहरिएकी छन् । 

अहिलेसम्म दिव्याको चलचित्र प्रदर्शनमा नआएकाले उनको अभिनय क्षमताबारे दर्शक जानकार छैनन् । तर, उनको सुन्दरताकै भरमा निर्माताहरु नयाँ चलचित्रमा अनुबन्धित गर्न तछाडमछाड गरेको देखिन्छ । 

कतिपयले बाबु रायमाझीकै सम्बन्धको कारण दिव्याले चलचित्र पाइरहेको टिप्पणी पनि गरेका छन्, जुन एक हदसम्म स्वभाविक पनि हो । तर, पहुँच र सम्बन्ध जे जस्तो भए पनि कलाकारको मूल्याङ्कन भने अभिनयबाटै हुने हो । 

‘एक्टर’बाट डेब्यु गर्न लागेकी दिव्या पहिलो चलचित्र प्रदर्शन नहुँदै ‘पिताम्बर’मा जोडिएकी छन् । समय दिन नभ्याउने भन्दै अभिनेत्री आँचल शर्माले हात झिकेपछि दिव्याको प्रवेश भएको बताइन्छ । यसबाहेक पनि उनले अर्को नयाँ चलचित्र साइन गरिसकेको बुझिएको छ । 

त्यसैले होला निर्माता, निर्देशकहरु चलचित्रको कथा र अभिनयमा भन्दा अभिनेत्रीको सुन्दरतामा मोहित हुँदा राम्रो चलचित्र बन्न नसकेको सुनासो सिनेवृत्तमा सुनिन्छ । अभिनेत्रीहरु पनि चलचित्रको सफलता र असफलतालाई भन्दा आफ्नो पब्लिसिटीमा रमाउँदा चलचित्रको भविष्य खतरामा पुग्ने गरेको गाईंगुईं सुनिन थालेको हो ।