नाडी छामेर भोलिसम्ममा रविलाई समात्ने तयारी

काठमाडौंमा समातेर हिजै राति पोखरा लगिएका पूर्व डिआइजी छविलाल जोशीको बयानको आधारमा रवि लामिछाने आज भोलि नै पक्राउ पर्ने सम्भावना बढेको छ । जोशीलाई कास्की प्रहरीले म्याद थपका लागि आज जिल्ला अदालतमा पेश गर्दैछ । 

हिजो राति बुद्ध एअरको उडानबाट पोखरा लगिनुअघि जोशीले आफूलाई मात्रै पक्राउ किन ? भनेर सोधेका थिए । उनले गोर्खा मिडियाको करोडौंको चेक काट्ने अरुलाई छाडेर आफूलाई मात्र समात्ने किन ? भन्दै राखेको प्रश्न सम्भवतः कास्की जिल्ला सरकारी वकिल र अनुसन्धान अधिकारीहरुसमक्ष आज पनि राखेमा सोही आधारमा रवि लामिछाने भोलि बिहानसम्म पक्राउ पर्नसक्ने गृहको उच्च स्रोतले बतायो ।

हिजो पक्राउ पुर्जी नै जारी नभएको अवस्थामा रवि लामिछानेले रास्वपा कार्यालयमा मान्छे भेला गराएर मिडिया ट्रायल गरेको प्रहरीको भनाई छ । रवि आफै प्रहरी कार्यालयमा हाजिर हुन जालान् त ? भन्ने जनआस्थाको जिज्ञासामा स्रोत भन्छ, ‘कतिपय प्राविधिक कुरा मिलाउनुपर्ने छ । त्यत्तिको गर्जेर हिँड्ने व्यक्ति लुरुक्क हाजिर हुन जाँदैन होला । हिजो पनि पुर्जी नै जारी नभई बेकार समात्न लागे भनेर होहल्ला गर्यो ।’ 

‘एउटै केसमा छविलाल समातिँदा ऊ (रवि) चाहि बच्छ ? किनभने गोर्खा मिडियाभित्र सहकारीको रकम घोटालामा छविलालभन्दा बढी जिम्मेवारी ऊ देखिन्छ ।’

प्रहरीले रविको नाडी छाम्दै घटनाक्रमलाई नजिकबाट विश्लेषण गरेको कतिपयको अनुमान छ । मुसालाई बिरालोले खेलाए झैं हैरान पार्ने ट्याक्टिस रविको हकमा पनि लागु हुनसक्छ । गृह मन्त्रालयका अधिकारीहरु भन्छन्, ‘एउटै केसमा छविलाल समातिँदा ऊ (रवि) चाहि बच्छ ? किनभने गोर्खा मिडियाभित्र सहकारीको रकम घोटालामा छविलालभन्दा बढी जिम्मेवारी ऊ देखिन्छ ।’

नियम,कानुन र व्यवहार कतै पनि लागु नहुने ‘स्वेट सेयर’ को गफ दिएका रविले प्रबन्ध निर्देशकको हैसियतमा १५ प्रतिशत सेयर लिएको विषय सबैभन्दा जटिल बनेको छ । उद्योग मन्त्रालयका एक जना सहसचिव भन्छन्, ‘पानीमा अपानवायु छाडेको जस्तो कुरो गर्नेलाई के भन्ने ?’

यसैबीच काँग्रेस उपसभापति धनराज गुरुङको पक्राउबारे काँग्रेसभित्रै मतैक्य नभएको बताइन्छ । नेता शेखर कोइरालाले आपत्ति जनाएपछि धनराजलाई नियन्त्रणमा लिएर अनुसन्धान थाल्ने विषय पछाडि धकेलिएको बुझिएको छ । तर, निष्पक्षताको लागि रवि, छविलाई पक्राउ गरिँदा धनराज पनि छुट्न नहुने धेरैको भनाई छ ।

यता रविले प्रधानमन्त्रीलाई आज बिहानै सामाजिक सञ्जालमार्फत चुनौति दिएका छन् । लेखेका छन्, ‘न्युयोर्कबाट आँखा नसन्काउनुस् प्रधानमन्त्रीज्यू,फर्केर आउनुस्,बसेर कुरा गरौं, सहकारी पीडितलाई न्याय दिने नियत भए म रुम मिलाउँछु, बिचौलियाको घर चाहिन्न । बाँकी भोलि...’