श्रीलंकाका पूर्वराष्ट्रपति पुल उद्धघाटनमा नजाने, विनोद चौधरीको प्रयास खेर

नेपाल भ्रमणमा रहेका श्रीलंकाका पूर्वराष्ट्रपति गोटावाया राजपाक्षेलाई पुल उद्धघाटन कार्यक्रममा सहभागी नगराइने भएको छ । 

नेपाली काँग्रेसका सांसद तथा विवादास्पद व्यापारी विनोद चौधरीको चाहनाअनुसार नवलपरासीको सुस्तास्थित झोलुङ्गे पुल उद्धघाटन कार्यक्रममा राजपाक्षेलाई लैजाने कार्यक्रम थियो । तर, अर्को देशका पूर्वराष्ट्रपतिलाई कार्यक्रममा सामेल गर्दा आलोचना हुने भएपछि चौधरीले अन्तिम समयमा स्थगित गराएका हुन् ।   

‘हिजो मान्यज्यू (विनोद चौधरी)ले सामान्य जानकारी गराउनु भएको थियो, तर आज फेरि सहभागि नगराउने भन्ने छ । उहाँ (राजपाक्षे) आज पूर्वी नवलपरासीमै हुनुहुन्छ होला, हामीलाई भोलि मात्र आउने जानकारी आएको छ’, नवलपरासीका प्रमुख जिल्ला अधिकारी स्किम श्रेष्ठले जानकारी दिईन् ।

आज दिउँसो राष्ट्रपति रामचन्द्र पौडेलले पुल उद्धघाटन गर्ने कार्यक्रम छ । सुस्ता गाउँपालिका वडा नं-५ मा बनेको झोलुङ्गे पुल उद्घाटना गर्न राष्ट्रपति पौडेलसहितको टोली काठमाडौँबाट हेलिकोप्टरमा त्यता जाँदैछ । 

कार्यक्रममा कार्यवाहक प्रधानमन्त्री तथा शहरी विकासमन्त्री प्रकाशमान सिंह, उर्जामन्त्री मन्त्ती दिपक खड्कासहित आधा दर्जन सांसदहरुको सहभागिता रहने बताइएको छ । भिआइपीहरुको आगमनलाई मध्यनजर गरेर सो क्षेत्रको सुरक्षा व्यवस्था कडा पारिएको जिल्ला प्रशासन कार्यालयले जनाएको छ । 

राष्ट्रपतिसहित मन्त्रीहरु दिउँसो २ बजे हेलिकोप्टरबाट कार्यक्रमस्थल मै उत्रने प्रजिअ श्रेष्ठले जानकारी दिईन् । ‘सुरक्षा व्यवस्थाको लागि हिजो साँझबाट प्रहरी परिचालन गरिसकेका छौँ’, जनआस्थासँग उनले भनिन्, ‘उहाँहरु दिउँसो २ बजे कार्यक्रम हुने ठाउँमा उत्रिनुहुन्छ ।’

श्रीलंकामा राजनीतिक संकट चुलिएपछि देश छोडेर भागेका राजपाक्षे श्रीमतीसहित अस्ति नेपाल आएका हुन् । हिजो नवलपरासीस्थित सिजिधाम घुम्न गएका उनी आज उक्त कार्यक्रममा सहभागी हुने कार्यक्रम थियो ।