अमेरिकाबाट आउँदा आउँदै ढिला भएको प्रधानमन्त्रीको प्रष्टीकरण, आलोचना गरेकोमा आपत्ति

प्रधानमन्त्री केपी शर्मा ओलीले सरकारले जति राम्रो काम गर्दा पनि आलोचना मात्र भएको भन्दै गुनासो गर्नुभएको छ । बाढीपहिरो र त्यसपछिको अवस्थाबारे जानकारी दिन आज सिंहदरबारमा आयोजित पत्रकार सम्मेलनमा उहाँले 'कान नसुन्ने मान्छे'को कथा सुनाउँदै  यस्तो दु:खेसो पोख्नुभएको हो ।  

‘एक जना कान अलि कम सुन्ने मान्छे थिए । कुरा गर्दाखेरी कान सुन्दैन भन्ने थाहा छैन ? अलि साह्रो बोल्नुपर्दैन ? अलि साह्रो बोल्नुस् भनेर रिसाउथे', प्रधानमन्त्रीले अगाडि भन्नुभयो, 'अलि साह्रो बोल्यो भने फेरि कान सुन्दैन भन्दैमा यति साहो कराउनुपर्छ त ? भनेर निहुँ खोज्थे । विस्तारै बोल्दा पनि भएन, साह्रो बोल्दा पनि भएन । यहाँ त्यस्तै भइरहेको छ । बाढी पहिरो जाँदै गदा म बाहिर भएपछि मन्त्रीज्यूहरुसँग कुराकानी भइरहेको थियो । उहाँले एलर्ट भएर काम गर्नुभएको छ ।’

प्रधानमन्त्री ओली संयुक्त राष्ट्र संघको महासभामा भाग लिन नेपाली प्रतिनिधिमण्डल नेतृत्व गर्दै असोज ४ गते अमेरिका प्रस्थान गर्नुभएको थियो । १० गते महासभालाई सम्बोधन गरेपछि केही दिन राजनीतिक भेटघाट गर्नुभएका उहाँ हिजो नेपाल फर्किनुभएको हो । अहिले सामाजिक सञ्जालमा प्रधानमन्त्री कार्यक्रम तालिकाभन्दा छिटो गएको र ढिलो फर्केको भन्दै प्रधानमन्त्रीको चर्को आलोचना भइरहेको छ । 

देश बाढीपहिरोको चपेटामा रहेका बेला भ्रमण छोट्याएर फर्कनुपर्नेमा उल्टै अनावश्यक कार्यक्रममा अल्मलिएको भन्ने प्रश्नमा प्रधानमन्त्री ओलीको यस्तो प्रतिक्रिया आएको हो । असोज ७ गते तय भएको 'फ्युचर समिट'मा सहभागी हुन केही दिनअघि अमेरिका जानुपरेको पनि उहाँले स्पष्टीकरण दिनुभएको छ ।

‘मैले सम्बोधन गर्ने १० गते थियो । महासभाको मुख्य विषयवस्तु फ्युचर समिट ७ गते थियो,  त्यसैले अघि गएको हुँ । त्यसका पनि विभिन्न सेगमेन्टहरु थिए', उहाँले भन्नुभयो, 'त्यसैले अघि जानुपर्थ्यो  । म जानुभन्दा अघि यस्तो विपद होला थाहा थिएन, अनुमान पनि थिएन ।’

आफू पानी पर्दा पर्दै अमेरिकाबाट हिँडेका दाबी गर्दै प्रधानमन्त्रीले थप्नुभयो,  ‘१० गते सम्बोधन सकेपछि ११/१२ गतेतिर आउने तयारीमा थिए । त्यही दिन पानी पर्यो । पानी पर्दा पर्दै १२ गते बिहानै म अमेरिकाबाट हिँडेको छु । आउँदाखेरी एक दिन ग्याप हुन्छ । १४ गते आइपुगेँ  ।’

उहाँले बाढी पहिरो प्रभावितहरुको उद्धार र राहतको लागि सरकारले कुनै कसर बाँकी नराख्ने पनि बताउनुभयो । तीनै तहका सरकार मिलेर उद्धार र राहतको काम अघि बढाउने प्रधानमन्त्रीको भनाई छ । 

‘तत्कालको संकट टार्न बेलिब्रिज बन्छ, दिर्घकालीनको लागि पक्की पुल पनि बन्छ । किसानहरुले अन्नपातको क्षतिपूर्ति पाउँछन् । घरविहीन भएकाहरुलाई उचित आवास निर्माण गर्न सहयोग गर्छौ । हामी सबै मिलेर टार्ने हो यो संकट’, उहाँले भन्नुभयो ।