पशुपतिनाथ पुगे भाजपा महासचिव

भारतीय सत्तारुढ दल भारतीय जनता पार्टी (भाजपा) का राष्ट्रिय महासचिव दुष्यन्तकुमार गौतमले पशुपतिनाथको दर्शन गरेका छन् । हिजो दिउँसो श्रीमतीसहित नयाँ दिल्लीबाट आइपुगेका उनी आज पशुपतिनाथको मन्दिर पुगेका हुन् ।

श्रीमती लक्ष्मी गौतमसहित उनी भुटान एअरलाइन्सको उडान नम्बर बी ३०७७४ मा हिजो दिउँसो पौने ३ बजे त्रिभुवन अन्तर्राष्ट्रिय विमानस्थलमा ओर्लेका थिए । 

पशुपति दर्शनअघि उनलाई पशुपति क्षेत्र विकास कोषको कार्यालयमा स्वागत गरिएको थियो । मूल भट्टले पशुपति परिसरमा रहेको आफ्नो निवासमा गौतम दम्पती र भ्रमण दलका सदस्यहरुलाई प्रसाद र रुद्राक्षको माला लगाइदिएका थिए । 

भारतीय राज्यसभाका पूर्व सदस्य गौतमको नेपाल भ्रमणबारे दुबै पक्षले केही पनि बताएका छैनन् ।