हिजो बार्दलीबाट हात हल्लाएका रविलाई आज सुटुक्क निकालियो

सुप्रिम सहकारी ठगीका आरोपित राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेको दोस्रो दिनको बयान सकिएको छ । 

जिल्ला सरकारी वकिलको कार्यालय रुपन्देहीमा बिहानदेखि शुरु भएको बयान साँझ सकिएको हो । जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, जिल्ला प्रहरी कार्यालयका अनुसन्धान अधिकारीहरूको उपस्थितिमा भएको ९ घण्टा लामो बयानमा ५० प्रश्न सोधिएकोमा उनले इन्कारी बयान दिएका छन् । 

पोखराको सूर्यदर्शन सहकारी ठगी प्रकरणमा अनुसन्धानका लागि जिल्ला प्रहरी कार्यालय कास्कीको हिरासतमा रहेका लामिछानेलाई हिजो रुपन्देही पुर्याइएको थियो । हिजैबाट बयान शुरु भएकोमा उनले आरोप अस्वीकार गरेका थिए ।

हिजो बयान दिएर सरकारी वकिल कार्यालयबाट बाहिरिनेक्रममा लामिछानेले बार्दलीबाट हात हल्लाउँदै समर्थक र पत्रकारलाई छोटो सम्बोधन गरेका थिए । 'बाघलाई खोरमा थुन्दैमा स्याल नहुने' उनको प्रतिक्रियामा समर्थकले हुटिङ्ग गरेका थिए । आज पनि त्यसैगरी बोल्नसक्ने भएकाले  प्रहरीले कडा सुरक्षा घेरामा राखेर बाहिर निकालेको छ । 

बुटवलस्थित सुप्रिम सहकारी संस्थाको १४ करोड २९ लाख रुपैयाँ जिबी राइको समूहसँग मिलेर गोरखा मिडिया नेटवर्क प्रालिका प्रवन्ध निर्देशक रहँदाका बखत अपचलन गरेको लामिछानेमाथि आरोप छ । जिल्ला अदालत रुपन्देहीले लामिछाने र उनका साझेदार पूर्वडीआईजी छविलाल जोशीसहित १२ जनाविरुद्ध पक्राउ पूर्जी जारी गरेको थियो ।