प्रधानमन्त्री ओली सिंहदरबारबाट सिधै सडकमा जाने

सरकारको नेतृत्व गरिरहेको नेकपा एमालेले आज काठमाडौँमा 'शक्ति प्रदर्शन' गर्दैछ । पहिला भृकुटी मण्डपमा हुने भनिएको र अन्तिममा दरबार मार्गमा सारिएको 'जागरण सभा' शुरु हुनुअघि काठमाडौँका विभिन्न स्थानबाट जुलुस निकाल्ने तयारी छ । 

सरकारमै रहेको दलले सडक प्रदर्शन गर्न लागेकाले आज उपत्यकाको ट्राफिक व्यवस्था अस्तव्यस्त बनेको छ । ट्राफिक प्रहरीले दरबार मार्ग क्षेत्रको सवारी आवतजावतमा रोक लगाएको छ ।

दिउँसो १ बजे हुने सभालाई प्रधानमन्त्रीसमेत रहेका अध्यक्ष केपी शर्मा ओलीले सम्बोधन गर्ने कार्यक्रम छ । सभामा जानुअघि उहाँ प्रधानमन्त्री कार्यालय सिंहदरबार पुग्नुभएको छ । प्रचार विभाग प्रमुख राजेन्द्र गौतमका अनुसार ओली सिंहदरबारबाट सिधै सभास्थल जाने तयारी मिलाइएको छ । 

अराजकताविरुद्धको प्रदर्शन भन्दै विरोधीलाई ताकत देखाउन लागेको एमालेले पचास हजार कार्यकर्ता उतार्ने दाबी गरेको छ । केहीबेरमा भद्रकालीबाट र्याली निकालेर सुन्धारा, रत्नपार्क हुँदै दरबार मार्ग पुगेर सभामा परिणत हुनेछ ।