‘श्रीमान्, एउटा बिन्ती बिसाउन चाहन्छु’

राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेले आफूलाई थुनाबाहिर राखेर अनुसन्धान गर्न अदालतसँग आदेश माग गरेका छन् । आज पाँचौ पटक म्याद थपका लागि जिल्ला अदालत कास्कीमा उपस्थित गराइएका उनले न्यायाधीश हिमलाल बेल्बासेसँग त्यस्तो आग्रह गरेको बताइएको छ ।  

इजलासमा उपस्थित एक अधिवक्ताका अनुसार करिब डेढ घण्टाको बहसपछि लामिछानेले न्यायाधीश बेल्बासेसँग ‘श्रीमान् एउटा बिन्ती बिसाउन चाहन्छु’ भन्दै समय मागेका थिए । इजलासले संक्षिप्त कुरा राख्न भनेपछि उनले दुई हात जोड्दै रिहा गर्न आग्रह गरेका हुन् । 

लामिछानेको भनाई उद्धृत गर्दै ती अधिवक्ताले भने, ‘श्रीमान्, मैले शुरुका दिनदेखि नै भन्दै आइरहेको छु कि म अदालतलाई सहयोग गर्छु भनेर । म यो देश छाडेर अन्त कहाँ जाउँला र ? न म कहिँकतै भाग्ने अवस्था छ । एक जिल्लाबाट अर्को जिल्ला जान परे पनि बरु म अनुमति लिएरै हिँडुला । तर, बिन्ती श्रीमान् !, म एउटा पार्टीको सभापति हुँ । मैले गर्नुपर्ने कामहरु बाहिर धेरै छन् । मलाई छाड्न आदेश दिइयोस् ।’

न्यायाधीश बेल्बासेले भने अन्य जिल्ला अदालतबाट पनि पक्राउ पुर्जी जारी भएको स्मरण गराए । ‘तपाईविरुद्ध अन्य कुन–कुन जिल्ला अदालतले पक्राउ पुर्जी दिएका छन्, बिर्सनुभयो ? छुटेको पाँच मीनेटमा फेरि पक्राउ पर्नुहुन्छ’, न्यायाधीशको जवाफ थियो ।

लामिछानेले त्यसपछि पनि इजलाससामु केही भन्न खोजेका थिए । तर, न्यायाधीश बेल्बासेले थप १५ दिन हिरासतमा राखेर अनुसन्धान गर्न प्रहरीले अनुमति पाएको आदेश सुनाएपछि उनलाई पुनः कास्की प्रहरीको हिरासतमा पुर्याइयो ।