एमाले सांसदकी पत्नी सहकारी प्रकरणमा संलग्न

एमाले सांसद तथा सार्वजनिक लेखा समितिका सभापति ऋषिकेश पोखरेलकी पत्नी अञ्जना कोइरालासहित २६ जनाविरुद्ध मोरङ जिल्ला अदालतमा मुद्दा दायर भएको छ ।  उमा गौरी कृषि सहकारीको रकम अपचलन प्रकरणमा अञ्जनासहित सहकारीका अध्यक्ष शम्भुप्रसाद रौनियारलाई पनि प्रतिवादी बनाएको छ । 

सहकारी सञ्चालक समितिकी सदस्य रहेकी अञ्जनाकै योजनमा विभिन्न बैंक तथा वित्तीय संस्थाबाट झण्डै साढे ११ करोड ऋण लिएको प्रहरीको प्रारम्भिक अनुसन्धानले देखाइसकेको छ । सहकारीको रकम हिनामिनामा सहकारीकै उपाध्यक्ष लक्ष्मण शाह, सचिव अन्सारी मियाँ, कोषाध्यक्ष शम्भुप्रसाद सिंह, सदस्यहरु आमोद मण्डल, जितमान ठाकुरको पनि संग्लनता रहेको सरकारी वकीलको कार्यालयको प्रतिवेदनमा उल्लेख छ । 

सहकारीमा समस्या देखिन थालेपछि अञ्जनाले २०७८ मा राजीनामा दिएकी थिइन् । तर सहकारी रकम हिनामिनामा आफ्नो कुनै संग्लनता नरहेको दावी गर्दै आएकी छन् । सभापति पोखरेलले पनि आफ्नो श्रीमतीलाई जोगाउन सहकारी प्रकरणको सम्पूर्ण दोष अध्यक्ष रौनियारमाथि लगाउँदै आएका छन् । 

सभापति पोखरेल पत्नीको उक्त विषयले यसअघि संसदमासमेत प्रवेश पाएको थियो ।