रुपन्देहीमा रविबिरुद्ध पर्सि मुद्धा दर्ता

बुटवलको सुप्रिम बचत तथा ऋण सहकारी संस्था लिमिटेडको ठगी प्रकरणमा संलग्नमाथिको पुरक मुद्धा अदालत खुल्नेबित्तिकै संभवतः पर्सी बिहिवार दर्ता हुँदैछ । बुधवार लुम्बिनी प्रदेश सरकारले माघी पर्वका लागि थप बिदा दिएपछि अदालतहरु आज बन्द रहेका छन् । जिल्ला सरकारी वकिलको कार्यालयले सहकारी ठगी प्रकरणमा पुरक मुद्धा दर्ता गर्न सार्वजनिक बिदाको दिनमा समेत बिहान ४ बजेदेखि राती १२ बजेसम्म खटिएर तयारी गरेको छ ।

करिब ३ सय ५० पृष्ठ लामो पुरक अभियोगपत्र दर्ता गर्ने तयारी रहेको बुझिएको छ । सुप्रिम सहकारीको ठगी प्रकरणमा तत्कालिन उपप्रधान तथा गृहमन्त्री रवि लामिछाने र गोर्खा मिडिया प्रा.लि. लाई उन्मुक्ति दिने गरी २०८१ बैशाख ३ गते रुपन्देही जिल्ला अदालतमा मुद्धा दायर भएको थियो । त्यसबेला बहालवाला गृहमन्त्रीलाई प्रहरीले प्रतिवादी बनाउनै नसकेको भए पनि अहिले पुरक अनुसन्धान गरी उनीबिरुद्ध अभियोग दाबीसहितको प्रतिवेदन सरकारी वकिललाई बुझाइएको थियो । पुस २६ मा बुझाइएको झण्डै एक हजार दुई सय पृष्ठ लामो प्रतिवेदनमा लामिछानेले सहकारीबाट लिएको २ करोड रुपैयाँ कर्जा तथा गोर्खा मिडिया नेटवर्क प्रा.लि.मा गएको रकम १० करोड ९९ लाख रुपैयाँ ठगी गरेको मुद्धा दायर हुँदैछ । 

सरकारी वकिल श्रोतका अनुसार सहकारी ठगी,संगठित अपराध र सम्पत्ति शुद्धिकरण कसुरमा मुद्धा चलाउन लागिएको छ । सुप्रिमका पूर्व अध्यक्ष तथा सल्लाहकार ओखलढुङ्गा बलम्बुका गितेन्द्रबाबु राई (जिबी राई), उपाध्यक्ष छविलाल जोशी, प्रबन्ध निर्देशक रवि लामिछानेसहित करिब २० जनाबिरुद्ध पुरक मुद्धा दायर हुँदैछ ।

पुरक मुद्धा दर्ता गर्न सार्वजनिक बिदाको दिनमा समेत बिहान ४ बजेदेखि राती १२ बजेसम्म खटिएर तयारी गरेको छ । करिब ३ सय ५० पृष्ठ लामो पुरक अभियोगपत्र दर्ता गर्ने तयारी रहेको बुझिएको छ । 

गोर्खा मिडिया नेटवर्क प्रा.लि.को प्रबन्ध निर्देशक हुँदा भटाभट चेक काट्दै आफ्नो,श्रीमती निकिता, उनको नाममा रहेका कम्पनी र लामिछानेकै आफ्नै खातामा पैसा सारेका रविबिरुद्ध पोखरामा सूर्यदर्शन र काठमाण्डौंमा स्वर्णलक्ष्मी सहकारी ठगी प्रकरणमा मुद्धा चलिरहेको छ । अन्य सर्वसाधारणलाई सामान्य मुद्धामा समेत थुनामा पठाउने गरिएकोमा कास्की जिल्ला अदालतले भने सर्वसाधारणको करोडौं रुपैयाँ अपचलन गर्ने रविलाई भने ६६ लाख रुपैयाँ धरौटीमा छाडेको छ । स्वर्णलक्ष्मी सहकारीको अनुसन्धानको सिलसिलामा उनी काठमाण्डौं प्रहरीको हिरासतमा छन् । 

सुप्रिम सहकारीको १ अर्ब २ करोड रुपैयाँ हिनामिना प्रकरणमा सहकारीका अध्यक्ष बुटवल उपमहानगरपालिका वार्ड नं. ८ का ओमप्रकाश गुरुङ्ग भने पुर्पक्षका लागि थुनामा छन् । मुद्धा दायर गरिएका २८ जनामध्ये पूर्व उपराष्ट्रपति नन्दकिशोर पुनका छोरा दिपेश पुनसहित ६ जनालाई अदालतले धरौटीमा रिहा गरेको छ । अरु प्रतिवादीहरुलाई फरार सूचीमा राखिएको छ ।

सुप्रिम सहकारीका अध्यक्ष तथा बचतकर्ताले जिबि राईले करोडौं हिनामिना गरेको जाहेरी दिएपछि भएको अनुसन्धानमा अध्यक्ष ओमप्रकाश गुरुङ्ग गत बर्ष फागुन ३ मा पक्राउ परेका थिए । बैशाख ३ गते सरकारी वकिल कार्यालयले मुद्धा दायर गरेको थियो । बैशाखमा मुद्धा दायर हुँदाका बखत लामिछाने उपप्रधान तथा गृहमन्त्री थिए । उनी २०८० फागुन २३ देखि २०८१ असार ३० सम्म पदमा बहाल रहेको र विभागीय मन्त्री भएका कारण प्रहरीले उनलाई सहकारी ठगीमा अनुसन्धानको दायरामा ल्याउन सकेको थिएन ।

सुप्रिम सहकारीबाट गोर्खा मिडियामा कुनै उद्देश्यबिनै १० करोड ९९ लाख ३६ हजार रुपैयाँ रकम पठाइएको पाइएको छ । २०७७ असोज ११ मा पहिलो पटक गोर्खा मिडियाको सिद्धार्थ बैंक लि.को खाता नं. ००११५९७८०९७ मा १ करोड रुपैयाँ पठाइएको छ । २०७७ माघ २८ मा छविलाल जोशीको नाममा २ करोड ५० लाख कर्जा देखाई गोर्खा मिडियाको ग्लोबल आईएमई बैंकको खाता नं. ०४०१०१००००५७७ मा पैसा पठाइएको छ । प्रबन्ध निर्देशक लामिछानेको नाममा कर्जाको कागज बनाइ २०७७ चैत १८ मा २ करोड रुपैयाँ ग्लोबल आईएमई बैंकमा जम्मा भएको छ । २०७८ बैशाख ५ मा सिद्धार्थ बैंकमार्फत १ करोड रुपैयाँ, बैशाख ९ मा ग्लोबल आईएमई बैंकमा ३० लाख, २०७८ असार ३ मा १ करोड, असार २२ मा सहकारीका संचालक कुमार रम्तेलको नाममा कर्जा बनाई १ करोड ३ लाख ३६ हजार, असोज १३ मा ५० लाख र असोज २४ मा २५ लाख पठाइएको छ ।

२०७८ पुस १२ मा विपिन कुमार आचार्यको नाममा कर्जा खडा गरी १ करोड ५६ लाख १५ हजार ग्लोबल आईएमई बैंकको खातामा हालिएको छ । १४ करोड २९ लाख रुपैयाँ गोर्खा मिडियामा गएकोमा ३ करोड ३० लाख रुपैयाँ संचालक भूपेन्द्र बाबु राईको नाममा कर्जा देखाइएको छ ।

रविले प्राईम टिभीका नाममा चर्का चर्का कार्यक्रम चलाउँथे, अरुमाथि दोहोलो काढ्थे, तर जब उनलाई पैसा आवश्यक पथ्र्यो जिबि र छवि संलग्न सहकारीहरुबाट पैसा पठाउन दवाव दिने गरेका थिए । गोर्खा मिडिया नेटवर्कमै गएको त्यत्रो पैसा आफैले चेक काट्दै मास्ने र अहिले बयानका क्रममा थाहा भएन, चेकमा साइन गरेको थिएँ भनेर भन्दा न्यायाधिशले पत्याउने अवस्था सिर्जना भएको छ । सुर्यदर्शन सहकारीका बचतकर्ताले आफूहरुमाथि अन्याय भएको बताइरहँदा स्वर्णलक्ष्मीका बचतकर्ताको मन दुख्ने हो हेर्न बाँकी छ ।